Boracay gyud?

Sa atong pagsulat niini, wala pay klaro kun mo-insister ba gyud ang SK nga adto gayud sa Boracay ang ilang seminar. Alang nila, kinahanglan adto gyud sa Boracay, kay dili masulod sa ilang ulo ug dili sila makakat-on kun unsa man ang ilang i-seminar, kun sa laing venue kini i-held. Kinahanglan Boracay gyud, otherwise, ma-walay kapuslanan ang seminar. .

Ngiga sa atong mga batan-on no ? Kadali gud nilang nakakat-on pagka-traditional politician? Kadali gud nilang nakakat-on unsaon pag-usik-usik sa salapi nga dili ila? Kadali gud nilang nakakat-on unsaon pagpahimulos sa gahom? Ug nganong karon man gyud nga mag-eleksyon na man ug lagmit, dili na sila kasublian?

Ug kun dili sila kasublian, asa man unya nila i-apply ang ilang makat-unan didto sa Boracay? Ako pa nila, ilang ihatag ang kwarta ngari namong mga senior citizen, aron makaadto sad mi sa Boracay.

Sa among panahon, Hadsan Beach ra gyud ang nahimong venue sa among seminar sa Department of Public Information. Lipay na kaayo mi. Dihay na-guest namo si Secretary Kit Tatad, didto mi sa Cansohong beach sa Talisay. Diha say naka-seminar mi sa Alegre Beach sa Sogod. Hinoon, wala pay Boracay niadtong panahona.

Usa ka higayon, nakakuyog mi sa tigum sa Regional Development Council (RDC), panahon ni Gov. Eddie Gullas, didto sa Salagduong Beach sa Siquijor. Gamay ra kaayo ang gasto. Tinuod gyud nga tigum, dili bakasyon, dili lulinghayaw, dili suroy-suroy lang.

Apan, karon, ang atong mga bata, Boracay gyud. Ngiga nila uy! Ug ila pa kining gi-justify. Ug mao kini sila karon ang umaabot natong mga city councilors, mga Mayor ug Gobernador – ug lagmit ang uban nila, ma-Kongresista pa o ma-Senador. Ug inig-abot niining mga panahona, adto na sila mag-seminar sa Hong Kong, Australia, Canada o sa Amerika. Padayon ang pag-junket sa atong mga magbabalaud.

Unsa man gyuy nahimo sa SK? Aduna ba silay performance report, aron atong masuta kun aduna ba gayud silay kapuslanan? Hinumdoman nga giimbento ni Presidente Marcos ang pundok sa mga batan-on, ang Kabataang Barangay, diin iyang gihimong mga pangulo ang iyang mga anak sa maong pundok. Ug karon, ang tanan niyang mga anak, pulos na naghupot og elective nga mga position sa kagamhanan. Dunay Kongresista, dunay gobernador, dunay Senador. Of course, nothing is wrong with this one. Gani, (ato ra ni ug ayaw lang mog kasuko), mibotar kong Bongbong.