Diplomasya

Hinarang ng isang pulis na armado

ang Chinese tourist bus na maraming tao;

Ang demands ng pulis agad ibinando

hiniling mabalik sa dating trabaho!

Upang makalaya pasaherong Chinese

sinimulan agad negosasyong panis;

Wastong diplomasya ay hindi ginamit

kaya hostage-taker nagtanim ng galit!

Nagdatingan agad ang maraming SWAT

na dapat lima lang o kaya ay apat;

Sila ay halata na kulang sa armas

pagka’t ang ginamit ay bilang at lakas!

Di ba’t ang militar at ang pulisya

ay maraming gamit sa pakikidigma?

May gas mask, bullet vest at saka iba pa—

bakit itong SWAT papasok na wala?

Kapatid ng pulis na gustong umawat

hindi pinalapit at dinakip agad;

Kung pinayagang siya’y tumulong sa batas

itong hostage-taking maagang nagwakas!

Sana ang kapatid ay pinasamahan

sa dalawang pulis sa kanyang likuran;

Sila ay papasok-- pakikiusapan

na huwag magtampo at sumuko na lang!

Kung may kasalanan pulis na nang-hostage

kamalian niya’y iwasang mabanggit;

Dapat may iba pang sa kanya’y lalapit

at ang ibang ito’y – ang ina o misis!

O di kaya nama’y may isang opisyal

na iginagalang – sinasaluduhan;

Sila’y maglalapit at pag-uusapan

paglaya ng hostage na mga dayuhan!

Kaya diplomasya ang dapat ginamit

upang pakalmahin ang puso at isip --

Nitong hostage-taker na dating mabait

sana’y buhay pa s’ya at ang walong hostage!