Goodbye SK eleksyon

Kaniadtong Biyernes ug Domingo nahuman ang pagpangrehistro sa mga bag-ong botante alang sa barangay ug Sanguniang Kabataan nga piniliay. Unya sama sa naandan kita gihapon sa publiko ang dobleng kayod sa mga gustong magpapili sa piniliay sa paghakot ug paghatag og allowances ngadto sa mga bag-ong botante. Dinhi ugod sa Pilipinas wa pa gani piniliay ang mga tang-an nga politiko namalit na og boto.

 Ang mga naningkamot sa pagpanghakot ug pagpanghatag og allowance para ngadto sa mga bag-ong botante dili lamang ang gustong magpapili sa barangay election kun dili apil usab kanila kadtong gustong magpapili sa Sangguninang Kabataan nga piniliay.  

Ang nakaparat kay murag ang barangay election lang ang madayon kay ang SK eleksyon wagtangon kun madayon ang laraw sa kagamhanang Noynoy Aquino.

Ang pangulo gusto nga madayon ang piniliay sa Oktobre 25 ning tuiga apan wa siya maghisgot sa SK. Seguro plantsado na ang sugyot ni DILG Secretary Jesse Robredo nga usa na lang ka representante sa mga batan-on ang pilion ug iapil kini sa piniliay sa barangay.

Mas maayo seguro kun mao na lamang kini ang himoon sa atong kagamhanan tungod kay sa pagka tinood wa man ugod poy gamit ang mga SK councilors. 

* * *

Gusto sa pipila ka mga kongresista ug mga Senador nga iuswag ang piniliay sa sunod tuig aron makadaginot ang gobyerno sa bilyones ka pesos nga gasto. Mao ba? Kay ngano kun sa sunod tuig himoon ang piniliay di na diay mogasto ang gobyerno og binilyon?

Kun dunay gustong magdaginot dili ang gobyerno kun dili ang mga kongresista ug mga senador nga natabangan sa mga barangay opisyales sa milabay nga piniliay kay labing seguro sa pag-abot sa piniliay sa barangay adto gyod ni nila dagan ug magpakitabang sa dakong gastohanan.