Si Presidente Noynoy Aquino, mihatag og talaan ngadto sa Philippine National Police nga angay unahon sa pagtagad ug pagsulbad sa kapolisan. Giingon nga si Presidente Noy “would rather have the PNP focus its resources mainly on solving murders and drug cases, with the latter having a miserable one-percent conviction rate.”
Alang sa Presidente, dakung problema karon sa nasud, nga kinahanglan tutokan sa kapolisan, mao ang nagtipun-og nga kaso sa pagpamatay nga wala masulbad, ug ang kaso sa illegal drugs, nga wala usay kasulbaran, uban sa record nga one-percent ra nga conviction.
Gumikan niini, matud ni Noynoy, nagsalig ang mga drug pusher nga dili sila mabilanggo. “Imagine if you’re a pusher, what fear would you have when you know that he would get away 99 percent of the time,” nagkanayon si Noynoy.
Ug sayod kita sa dakung kadaut nga ihatag sa gidiling drugas ngadto sa katawhan ug sa nasud as a whole. Maoy hinungdan, alang kang Noynoy, ang pagsulbad niini, kinahanglan maoy unahon pag-atubang sa PNP.
Daku kining hagit alang sa kapolisan tungod kay mag-atubang sila’g gamhanan kaayo nga mga kaaway. Suma, duna ba goy drug lord nga napriso? Ang daginuton lang sa otoridad, mao ang gagmay’ng mga user, ug mga pusher. Apan,ang tinubdan, ang source, ug ang mga manufacturer sa gidiling mga drugas, nagkatawa lang. Nganong di man gyud ni sila madakpan?
Usahay makadungog ta nga dunay gi-raid nga mga tiggama, mga laboratory sa illegal drugs, apan, ang laboratory ray madakpan, walay tag-iya. Ngano man ni? Busa alang kang Noynoy, kinahanglan tinud-on na gyud ang paggukod sa mga user, pusher ug manufacturer sa maong mga drugas. Tiaw moy one-percent ra ang conviction rate sa pagpanggukod sa mga tawo nga nagpaluyo sa pagdagsang sa operation sa illegal drugs!
Laing nabalak-an ni Noynoy, mao ang mahitungod sa unsolved cases sa pagpamatay. Murder. Bisan dinhi sa ato nga hapit na kada-adlaw ang kriminalidad, daghan na kaayong mga unsolved cases sa pagpamatay.
Busa, alang kang Noynoy, mao kini ang duha ka concern nga angayan hatagan sa unang pagtagad sa kapolisan, kay matud niya: ”We should solve them first . Eliminate them, especially those which are organized and ideologically-based. Then once these problems are solved, you can devote your resources to other concerns.:
Husto. First things first, aron di ta maglibog asa magsugod ug unsay sugdan. Klaro kining mga priorities (duha ra) ang gihatag ni Noynoy ngadto sa PNP. Nga kun masulbad kini sa kapolisan, everything will follow. Ug sayon na lang kaayo.
Sa ato pa, ang tanang resources sa kapolisan, i-focus niining duha ka concerns, siyarog di sila magmalampuson. Unya na nang uban. Kini, tungod kay kun masulbad kining duha ka major concerns, daghang mga concerns ang masulbad.
Akong usbon, klaro ug specific ang instruction ni Noynoy ngadto sa kapolisan. Manghinaut kita nga aksyonan kini sa PNP, dili kay tapus mo-salute sa ilang commander-in-chief, way mahitabo.