Wala man kahay ngipon, nganong hadlok man silang mapaakan sa Truth Commission?

It’s bound to fail … mao kini ang pangugat ni Senador Arroyo, bahin sa Truth Commission. Gidasonan kini nila ni Senador Miriam ug Johnny, ug Representante Edcel, nga kuno walay legal basis, unconstitutional, ug dili gani makapa-subpoena, dili maka-papriso, walay klarong funding, ug duplication sa Ombudsman ug Department of Justice. Hinungdan nga it’s bound o fail gyud. May pagka-tinuod, di ba? 

 Unya, duna pay mga makapin pagdaot nga kuno dili angay si Davide nga maoy mangulo sa Commission, gumikan sa mga isyo batok usab kaniya. Sa ato pa, wala sila mosalig ni Davide. Mas kasaligan pa sila si Joker Arroyo, Johnny Enrile, Miriam Santiago, ug Edcel Lagman. Sila ang angayan mangulo sa Truth Commission.

Dili man ko abogado, bisan tuod og mora kog Attorney, labaw pang dili Senador o Kongresista … apan, sa ubos kong panabot, ang bugtong tuyo sa Davide Commission, dili ang pagpa-priso ni bisan kinsa, kondili, ang pagpangita ug pagpagawas lang gyud sa matuod.

Nagkinahanglan bag balaud ang pagsota hain ang tinuod, hain ang bakak? Daghan ang nagduda nga daghang kalapasan ang nahimo sa miaging administrasyon. Apan, sila si Lagman wala motuo sa maong mga pagduda, kay alang kanila walay kasal-anan, walay corruption ang ilang administrasyon.

Kinsa may atong tuhoan? Ang Noynoy administration, o sila si Lagman? Outright, dili kita makaingon nga sad-an ang previous administration. Ingon man, dili usab sila si Lagman makaingon nga limpyo ang ilang administrasyon.

Kinahanglan ipagawas ang kamatuoran, aron katak-opan na ang maong isyo, aron kita maka-move forward. Ug dili na magpabilin ang mga pagduda kun sad-an ba, o dili, ang administrasyon nila ni Lagman. Mao kini ang bugtong tuyo sa Truth Commission … pagpagawas lang gyud sa matuod. Magkinahanglan ba kini og balaud? 

Apan, kun pananglitan, usa ikaw sa buot pakigsultian nila ni Davide, nganong di man sad ka mosanong, kun buot kang motabang pagkagawas sa kamatuoran? OK, atong tugotan nga walay mahimo ang Truth Commission, nganong mahadlok man sila? Unsa may ilang kahadlokan? Hadlok sila nga tingali unyag mogawas gyud ang tinuod? Nganong mahadlok man sila sa TRUTH? Kun buot hunahunaon, angayan silang mo-cooperate sa Truth Commission. For all we know, mao kini ang makapamatuod nga limpyo ang pamunoan ni Kongresista Gloria.