Naukay na ‘sab ang mga estudyanteng lalaki sa kolehiyo sa bag-ong giduso karon sa Armed Forces of the Philippines nga kinahanglan nga ipatuman pagbalik ang Reserve Officers Training Corps kon ROTC. Buot sa armadong kusog nga ibalik ang maong kurso diha sa kolehiyo aron sa pagpahamtang og disiplina sa mga estudyante ug pag-umol og reserved officers nga labaw nga mahinungdanon panahon sa mga hulga sa seguridad sa atong nasud. Kun ang ubang nasud gipugos ang ilang mga lalaki nga estudyante pagpa-ubos sa military training, dinhi sa Pilipinas wa’y pugsanay ang pagbansay-bansay. Dako kung uyon nga ibaik ang ROTC tungod kay di’ angayan nga palabyon ang daghang kahigayonan ug kasinatian nga makuha gikan sa training ubos sa pipila ka kondisyones.
l Gikinahanglan nga military training gyud ang ipatuman ug dili masubli pa ang mga kaso sa hazing sa mga opisyal sa ROTC. Nahimong kontrobersyal kaniadto ang military training tungod kay nilapas na sa tukma nga lagda sa pagbansay-bansay ang mga opisyal. Nagtapun-og ang kaso sa hazing nga wa’ nay kalainan sa gipanghimo sa gang ug fraternities. Di’ matago nga gi-abuso ang pipila ka sakop sa military, navy ug airforce ang ROTC kaniadto aron sa pagpatigbabaw sa ilang gahum ug pagtahod kanila.
l Mahimo lang ipatuman ang ROTC kung di’ na masubli pa ang korapsyon sa mga trainer. Kaniadto, mangayo lang og amotan ang mga nagbansay-bansay sa mga estudyante aron igasto sa pagpakaon sa mga bisita o birthday mismo sa opisyal ug makapasar na ang usa ka kadete. Dakong isyu kaniadto ang daghang mga pabor nga pangayuon sa usa ka opisyal o grupo mismo sa mga trainers gikan sa mga kadete ug mahimo nang di’ mabuwad ug sigurado nang pasar sa ROTC.
l Wa’ koy reklamo kung ibalik ang ROTC kung tinud-anay gyud nga military training nga himuon ug di’ lang ipaagi og lingkod-lingkod sa ilawom sa punoan sa kahoy aron pagpatay sa oras. Ug di’ ko moreklamo kung tinuod gyud nga armas ang ipapas-an sa mga estudyante di’ lang kahoy nga giporma nga M-16. Wa’y makat-onan ang mga kadete kung taphaw lang kaayo ang training. Nahimo pang kataw-anan kaniadto kung unsay gamiton sa pagpanalipod sa atong nasud kung simbako moabot ang panahon nga gubaton ‘ta sa uban nasud. Ang tubag? Kahoy nga gipormang armalite nga gigamit sa ROTC training.
l Dakong bahin sa akong kasinatian sa kolehiyo ang ROTC. Nagtungha ko nga wa’y kasigurohang maka-gradwar tungod sa akong kapakyas sa pagkuha sa maong kurso atol sa regular nga semester. Salamat ni anhing senador Raul Roco ug subling gibuksan ang summer class sa ROTC. Apan sayop ko sa akong pagtuo nga hayahay ang summer tungod kay paspas ang training ug posibleng mas gaan itandi sa regular nga semester. Nasayop ko tungod kay ingon og sa tinuod nga military training ang among gihimo. Gipapas-an mi og tinuod nga M-16 ug gipa-ubos sa firing gamit ang tunga sa sako nga tinuod nga bala. Di’ ‘sab nako makalimtan ang pagmata namo og kaadlawon aron mag-jogging kauban ang mga opisyal sa militar, ang pag-formation alas otso sa buntag, ang lecture kabahin sa pag-detonate sa bomba ug uban pa. Gipa-ubos ‘sab mi sa training sa kinabuhi sa mga ranger ug nga unsa ang pamaagi sa guirella warfare.
l Kung susamang proseso sa ROTC training ang himuon, sigurado ko walay estudyante nga moreklamo tungod kay puno sa kasinatian ug kaalam ang usa ka buwan nga pagpuyo sa kampo. Di’ malalis nga dakog matabang sa disiplina ang military training apan kung himuon ni sa regular nga semester, dako ning perwisyo sa mga tinun-an. Di’ ba diay mahimo ang training sa usa ka tibuok summer aron wa’y laing kabilinggan ang mga kadete?
Email: rico_lucena@abs-cbn.com or ricolucena@yahoo.com