Mao ni ang tubag ni Senador Serge Osmeña sa diha nga gipahimangnoan siya sa usa ka reporter sa Manila nga tingalig ma-offended ang mga senior citizen sa iyang sugyot pag-scrap sa iyang giingon nga “idiotic” nga mga tax exemptions, sama sa VAT exemptions nga gihatag ngadto sa mga senior citizen.
Sa ato pa, alang sa atong pinangga nga Senador, kinsa gikampanyahan og maayo sa mga senior citizen sa miaging eleksyon, kaylagi Sugbuanon, walay sapayan alang kaniya, dili magsakit ang iyang tiyan kun mahiubos kaniya ang kapin sa 9 milyones ka senior citizen sa tibuok nasud.
Kay kono alang kaniya, nabalaka siya sa kahimtang sa panalapi sa nasud, diin mikabat og P350 bilyones ang budget deficit. Niya pa: “I believe the estimated revenue losses from smuggling could reach as high as about P120 billion to P150 billion.
Unfortunately, we have a P350-billion deficit, so even if we plug that particular loophole, it is not going to be enough.”
Correct ka dyan, Serge. Apan, nganong imo mang giisip nga “idiotic” ang tax exemptions sa mga senior citizen? Perhaps, daghan tingali kaayong mga “idiotic” tax exemptions nga gihatag sa Kongreso ngadto sa mga negosyante ug ubang hut-ong sa katilingban, apan, kining gipahimuslan na karon sa mga senior citizen, dili man tingali maisip nga “idiotic.”
Padayon ni Serge: “What I’m saying is from the microeconomic point of view, from the microfinance point of view, if we give tax exemptions to everybody who feels they deserve a tax exemption, we will end up eroding the revenue base of the government.”
Correct gihapon ka, Serge. Apan, sa imong hunahuna, ang imong mga lola ug lolo, ang imong mga tiyo ug tiya, imong mga agaw ug ubang mga paryente nga senior citizens, dili sila angay sa tax exemptions, dili mo-deserve?
Ang mga Senador ug ang mga Representante nga mipasar sa R.A. 9994 kon ang Expanded Senior Citizens Act of 2010, mga “idiotic” diay to sila? Ug karon ning imong pagbalik sa Senado, imong paningkamotan nga ma-scrap kining imong giingon nga “idiotic” nga tax exemption sa mga senior citizen?
Ang ato karong budget mikabat og P1.4 trillion, ug lagmit, modul-an na kini sa P2 trillion sunod tuig. Siyaro na man sad og di mo kagahin og gamay alang sa mga senior citizen.
Lahi ang sector sa mga senior citizen. And I don’t think the labor sector, the students, the Ladlads, the farmers, the tricycle drivers, the security guards, the cockfighters, the boy scouts, the veterans, the barbers, and the other sectors in the country, would also ask for tax exemptions … kun mao man kini ang nabalak-an ni Serge.
OK, i-review ang tanang tax exemptions nga gihatag sa gobyerno, ug klarohon kun hain niini ang maisip nga “idiotic.” Daku ang akong pagtuo nga dili “idiotic” ang alang sa tanang katigulangan sa tibuok kapupud-an. Serge?