Interesado nga mopalit ang Cebu City Hall sa tulo ka mga light planes nga isubasta sa Department of Education. Nagbalor ang tulo ka gagmay'ng eroplano og P4.6 milyones, apan mga depektoso na kini.
Si Bise Mayor Joy Augustus Young mipahibalo kagahapon nga interesado ang kagamhanan sa dakbayan sa Sugbo nga makaangkon sa tulo ka gagmay'ng mga eroplano.
Apan si Mayor Michael Rama nagduhaduha pa sa pagkuha sa maong tulo ka abyon. Ug buot ni Rama nga tun-an una nilang mga opisyal ang maong lakang. Si kanhi mayor ug karon Rep. Tomas Osmeña buot usab nga makuha sa dakbayan ang tulo ka abyon aron magamit sa search and rescue operations.
Dili maayong magdalidali ang kagamhanan sa siyudad. Ang DepEd mismo ang nagpahibalo nga mga depektoso na ang mga abyon, busa nagkinahanglan pa kini og dugang pundo aron ipaayo.
Usik lamang sa pundo kun ang tuyo mao ang paggamit sa search and rescue operations nga gastohan og P4.6 milyones pagpalit og laing pila ka milyon aron ipaayo ug ipa-kondisyon sa makina sa tulo ka abyon.
Kun dili regular ang paggamit sa abyon, sama sa ubang sakyanan, maguba kini. Kun kanunayon ang paggamit niini, magkinahanglan na usab og pundo ang Cebu City Hall alang sa gasoline, maintenance ug mga piloto.
Aduna pay mas daghang angayan gastuhan sa kagamhanan sa dakbayan sa Sugbo sama sa garbage truck nga nagkulang sa kabaranggayan ug pagpaayo sa drainage system sa siyudad nga kanunay nang gibahaan tungod sa sigeng ulan ug ang pagtabang sa mga nanimuyo sa kasapaan ug kabaybayonan sa siyudad.
Hunahunaon una sa mga opisyal sa siyudad kun importante ba ang maong abyon sa siyudad sa Sugbo ug kun dili ba maalkanse ang katawhan sa siyudad kun paliton kini.