CEBU, Philippines - Una, gihatagan sa Mactan Cebu International Airport Authority og tunga sa milyon nga pabawon ang ilang membro sa board nga nagretiro na sa iyang katungdanan. Karon nanghatag na usab kini og katumbas sa tulo ka buwan nga suholan nga bonus ug dugang treyenta mil ka pesos sa matag usa ka sakop niini sa board.
Ang napulo ka sakop sa Mactan Cebu International Airport Authority Board midawat og tag P118, 200 matag usa gawas sa ilang General Manager nga midawat og 144,736.44. Ang kantidad nga nadawat sa mga sakop sa Board ilang gitawag og Collective Negotiation Agreement Bonus.
Sa kinatibuk-an moabot sa P1,182,00 ang gipagawas sa pundo sa MCIAA alang sa bonus sa mga sakop sa iyang board kaniadtong Hunyo 28 ning tuiga.
Aron makadawat sa bonus, ang mga sakop sa board mihatag sa ilang kaugalingon og grado nga very satisfactory sa ilang trabaho. Ang mga sakop sa board nga midawat og bonus mao sila si DOTC Secretary Leandro Mendoza, Governor Gwen Garcia, Aviation Authority director Ruben Giron, Justice Undersecretary Jose Vicente Salazar, Department of Finance director Ma. Lourdes Dedal, Private Sector representative Valeriano "Bobit" Avila, Renato Osmeña, Gordon Allan Joseph, Winglip Chang ug kanhi Tourism Regional director Patria Auroa Roa.
Ang bonus nga gidawat ning mga tawhana gihulagway sa Commission on Audit nga illegal apan ilang gipamugos nga kini legal.
Nganong modawat man og Collective Negotiation Bonus ang mga sakop sa Board sa Mactan Cebu International Airport Authority? Angayan ba ugod ni silang hatagan og bonus? Pagkalooy sa MCIAA gihimo lang gatasan sa iyang mga opisyal