Kaniadtong miaging Miyerkules gisermonan ni Pangulong Noynoy Aquino ang labaw sa Philippine Atmospheric Geophysical and Astronomical Service Administration (PAGASA) nga si Prisco Nilo tungod sa sayop nga pagtag-an sa dagan sa hangin ni bagyong Basyang hinungdan nga wa makapangandam ang mga dapit nga giagian niini.
Ang bagyong Basyang gitagna sa PAGASA nga moagi sa Northern Luzon apan didto diay kini moagi sa Southern Luzon ug Metro Manila sa iyang pagbiya paingon sa Tsina sa gikusgon nga 120 kilometros matag takna.
Sa iyang pagbiya gibilin ni Basyang ang 39 ka mga tawong nangamatay ug dakong kantidad sa mga pananom, isdaan ug inprastraktura.
Di lang ni ang unang higayon nga nasipyat ang PAGASA sa ilang pagtagna sa agian sa bagyo. Seguro lab-as pa sa atong panumdoman ang bagyong Frank nga milunod sa higanting barko sa Sulpicio Lines ug lain pang mga sakyanan sa kadagatan nga mikalas og halos usa ka libo ka mga tawo ug pasahero.
Ang kapitan sa MV Princess of the Stars mipalabigar sa iyang gidalang barko tungod kay segun sa PAGASA dili moagi sa ilang agian ang bagyong si Frank pero ang nahitabo ila gyod hinoong nasugatan ang mata sa bagyo nga mituwad sa higanting barko sa Pilipinas.
Dinhi sa Sugbo giuswag ang 12th Asian Summit ug gisuspenso ang klase sa mga tunghaan tungod kay gipaubos sa signal numero uno ang Metro Cebu apan ang nahitabo namaak ang kainit sa adlaw nga midapat sa imong panit.
Maayo pa ang kugita nga si Paul kay sa atong PAGASA kay wa pa masipyat sa iyang mga panagna kun kinsa ang mga modaug sa 2010 World Cup.
Ang sipyat sa PAGASA sa ilang mga panagna sa bagyo katapusan na unta kadto matud pang Pangulong Aquino ngadto ni Prisco Nilo. Apan ang maong sipyat makapahigmata na usab unta sa Malakanyang nga taud-taud nang natulog sa suliran sa buhatan nga iyang gisermonan.
Masabtan na unta sa Malakanyang nga wa gayoy maayong panagna sa panahon kun ang kagamitan sa iyang weather bureau maguwang pa nila ni Magellan ug Lapu-lapu.
Ang sipyat sa PAGASA sa iyang pagtagna ni bagyong Basyang makapamoderno na unta sa kagamitan sa iyang buhatan.