Daghan ang malipay sa bag-ong polisiya nga gipahibalo sa Cebu City Integrated Traffic Operations and Management (CITOM) sa pagpili lamang sa mga sakyanan nga ipa-towing.
Si kanhi konsehal ug karon Citom chairman Sylvan “Jack” Jakosalem mipahibalo nga hingusgan ang towing operations panahon sa peak hours, alas 7 ngadto sa alas 10 sa buntag, ug dili sa gabii nga maoy naandan sa mga pribadong towing firm nga sa kagabhion mag-operate tungod kay sayon lamang himuon.
Apan labaw’ng gikalipay sa mga motorista mao ang pagguyod lamang sa mga sakyanan nga maka-ali (obstruct) sa agianan. Kadtong wala maka-ali sa agianan, sumala pa ni Jakosalem, isyuhan lamang og temporary operator’s permit (TOP) ug dili lang guroyon ang sakyanan.
Gihimong sanglitanan ni Jakosalem ang nangaging mga towing operations diin gipangguyod ang mga sakyanan bisan ang drayber namalit lang og tambal, unya wala mag-abong sa agianan ang sakyanan.
Nakamata na gyud sa dakong sayop sa pagpatuman sa Anti-Towing Ordinance ang mga opisyal sa Citom. Dili pa ulahi ang tanan aron korehian nila ang panglantaw sa katawhan nianang maong ordinansa nga gitumong aron makakuwarta ang mga pribadong towing firm. Sa kapin dos mil pesos nga mabayad sa tag-iya sa sakyanan, kapin lang sa P100 ang masulod sa kaban sa kagamhanan sa dakbayan.
Kun ingon na niini ang polisiya sa Citom ubos sa pamunoan ni Mayor Michael Rama, ang mga Sugboanon – ug bisan ang mga motorista – hugot nga mosuporta niining ordinansa nga nagtugot pagguroy niadtong mga sakyanan nga makababag sa agianan.
Wala nay towing crew ug traffic enforcer nga hidunggaban, hipangsukmagan ug hipangkulatahan. Wala nay kaso nga maabot sa korte mugna sa pagpangguroy sa mga towing firm.