Estriktoha ang MVIS clearance Road Safety Council

Gitukod kini sa mga ahensiya sa gobyerno nga gitahasan unta pag-regulate sa transportasyon sa tungatungang Kabisay-an.

Apan unsa man ang mandato niining maong Road Safety Council?

Igo lang ba kini sa pagtuki unsaon sa paglikay sa mga disgrasya sa kadalanan.

Usik lamang sa panahon ug kuwarta kining maong Council nga gihingusgan nilang Land Transportation Office (LTO-7) regional director Raul Aguilos ug Land Transportation Franchising and Regulatory Board (LTFRB-7) regional director Benjamin Go.

Aduna na kining LTO ug LTFRB nga gitahasan sa balaod pagpatuman sa balaod sa trapiko ug pag-regulate sa transportasyon sa nasud.

Apan kining mga ahensiyaha wala makatuman sa ilang trabaho sumala sa gimbut-an sa balaod hinungdan niining sunodsunod nga mga disgrasya mugna sa mga pampublikong sakyanan nga wala hikutaha pag-inspeksiyon sa Motor Vehicle Inspection Section (MVIS).

Unsa man diay tuyo niining MVIS? Maghulat ra ba diay kining opisinaha kun ihatod sa mga operator sa mga public utility vehicles ang ilang mga sakyanan aron inspeksiyonon?

Dili ba rekisitos man sa renewal sa registration ang MVIS clearance?

Kun magpaabot ang LTO-7 nga boluntaryong ihatod sa mga operators ang ilang mga bus, minibus, taxi ug PUJ sa road worthiness test, magpaabot na lang kitang daan sa daghan pang mga disgrasya sa kadalanan.

Apan kun estriktohon sa LTO-7 ang pagpangayo og MVIS clearance sa mga PUVs sa dili pa i-renew ang ilang mga sakyanan, maminosan kun dili man maundang ang mga disgrasya.

Kun ipanguwarta usab sa LTO-7 ang MVIS clearance, manguros na lang kita og kadaghan.

* * *

Nagkaabot ang mga pahiyom nilang Gobernador Gwendolyn Garcia ug Bise Gobernador Gregorio Sanchez Jr. sa dihang nagkaabot atol sa inaugural session sa Hunta Probinsiyal sa Sugbo.

Klaro kaayo nga mga ‘plastik’ nga pahiyom ang duha samtang dayag ang ilang panagbangi human masublii ang ilang mandato niadtong Mayo 10 nga eleksiyon.

Kun mahimo nila ang pagpahiyom sa usa’g usa sulod sa pipila ka minutos aron ipakita sa mga sakop sa media nga pulos sila mga ‘civil’ sa usa’g usa, nganong dili man lang nila tinud-on ang ilang kahiusahan aron hangtod sa hangtod na ang ilang pagpahiyom sa usa’g usa?

Apan atol sa inaugural session, silang duha nagpangayoay og suporta sa tagsatagsa nila ka programa.

Kun matinuod nga magsuportaay sila sa usa’g usa, nindot kaayo ang dagan sa Kapitolyo.

Dili hinuon angay ipasabot nga kun magsuportaay silang Gwen ug Greg, dili na lang sila magginukdanay sa ilang mga sala.

Angay gihapong suportahan ang tinguha sa bag-ong partido nga nadag-an ni Greg sa lalawigan sa Sugbo nga mao ang Liberal party nga ma-imbestigar ang mga nangaging kuwestiyonableng transaksiyon sa Kapitolyo ug pagpasaka sa tawong nalambigit niini, apil na ang gobernadora.

Nga kun adunay nakit-ang kahiwian sa mga transaksiyon diha sa opisina sa bise gobernador, mopiyong na lang usab si Gwen.