EDITORYAL - Ang bag-ong bayani natawo na

Naugtas na ang mga Pilipino sa mga saad sa mga politiko pagpitol ug pagtul-id sa korapsyon nga mihamok sa nasud sukad pa sa panahon ni kanhi Presidente Ferdinand Marcos .

Kini tungod kay human mawala si Marcos, ug mipuli ang nagkalainlaing pangulo sa nasud wala may nakapapiang ug nakapainutil sa korapsyon.

Misamot hinuon kini sa paglipang , mitambok, milig-on, ug labing mimangtas, nga gani gumikan sa katag-as sa iyang mga gaway nga mibilikis ug milikos sa mihutlay na sa kakabus nga nasud, misangpot sa pagpalumoy ang kakuyapon nang ekonomiya sa Pilipinas hangtod nga kini mitinga na ug dayon na unta sa pagbuy-od sa hingpit niyang pagkabangkarota.

Apan ang nagpiyong nang mga mata sa kawala nay paglaum nga may makasalbar pa sa makaluluoy nga kahimtang sa nasud, mihinayhinay sa iyang pagbuka dihang nasiplatan niini ang bidlisiw sa mibanagbanag nga bag-ong paglaum , ang kadaugan sa gituohang bayani batok sa korapsyon , ni President-elect Benigno "Noynoy" Aquino III sa milabay’ng eleksyon niadtong Mayo 10.

Karong Miyerkules , Hunyo 30, sa kaudtohon hingpit na siyang manumpa isip ika-15 nga presidente sa nasud nga Pilipinhon.

Sukad sa pagdawat niya sa hagit ug tanyag nga siya’y himoong pangulo sa nasud , gihimo na niyang damgo ang pagsalbar sa ekonomiya niini pinaagi sa pagpuo sa korapsyon.

Dinhi itutok karon ang tanang mga mata sa mga Pilipino ug sa mga tigpaniid sa ubang kanasuran sa gawas , kun unsaon niya paggamit ang iyang hinagiban aron ikahabas hangtod nga hingpit nga maputol ang tanang gaway sa korapsyon.

Siya maoy bag-ong paglaum sa mga Pilipino, ug ang tanan angayang mosinggit sa kalipay ug ipalanog sa pag-ingon , nga sa katapusan, natawo na ang bag-ong bayani nga maoy mopuo sa korapsyon sa nasud nga Pilipinhon.

Uban sa tanan niyang matudlo nga hepe ug piyado sa nagkalainlaing departamento sa kagamhanan , gilauman nga sila makighiusa sa iyang kawsa ug kawsa sa tanang Pilipino, ang pagpuo sa hingpit sa korapsyon sa Pilipinas.

MABUHAY ANG BAG-ONG PRESIDENTE BENIGNO"NOYNOY' AQUINO III UG SA TANAN NIYANG MAHIMONG MIYEMBRO SA KABINETE, SILA ANG BAG-ONG BAYANING PILIPINO.