EDITORYAL - LTO-7 way direksyon

Naputos sa pagsaway ang Land Transportation Office (LTO-7) human matagak ang tourist bus sa JD Tours sa barangay Cansomoroy, Balamban nga mikalas og 21 ka mga tawo.

Apan magsige gayod ang pagsaway sa publiko sa kapulpol ug ka-inutil sa LTO-7 kun dili sila mobuhat sa ilang trabaho nga mao ang pag-regulate sa transportasyon sa rehiyon siete.

Maayong isipon nga dakong hagit ni LTO-7 regional director Raul Aguilos ang pag-usab sa direksiyon sa iyang buhatan, mentras wala pa mo-asumer ang sunod administrasyon ni President-elect Benigno Simeon “Noynoy” Aquino, ug undangon na ang ilang batasan nga molihok lang kun aduna nay disgrasya nga mahitabo ug mokalas na og daghang kinabuhi.

Kagahapon, mipagawas og resulta ang LTO-7 sa written examination sa 31 ka mga drayber sa JD Tours ug 22 niini ang nahagbong. Ang pasulit gihatag human dayon sa gipahigayon nga seminar.

Nasayod si Aguilos nga usa ka matuod nga sitwasyon nga adunay daghang mga drayber – dili lang sa JD Tours – ang kulang sa kabangkaagan sa regulasyon sa pagmaneho og sakyanan. Ug mao kini ang labing dakong hinungdan sa mga disgrasya.

Bisan ning adlawa, kun mag-estambay ang mga operatiba sa LTO-7 sa usa ka highway ug parahon ang mga nagmaneho og minibus, PUJ ug taxi o bisan sa pribadong mga sakyanan, diyutay lamang niini ang makapasar kun ipaubos sa pasulit. Ang pangutana: nganong nangalutsan man og Driver’s License kanang klaseha sa mga drayber? 

Dili makapanghimakak si Aguilos nga diha sa buhatan sa LTO-7 nahimong tinubdan sa korupsiyon ang lukatanan og lisensiya, bisan nagbuntaog ang dagko kaayong mga tarpaulin kalabot sa “Anti-Fixing Law.”

Hangtod dili makorehian ang direksiyon sa pagdumala ni Aguilos nianang LTO-7, ang sitwasyon mao gihapon: manguros lang kun naigo na sa kilat!