EDITORYAL - Dakong problema sa KEPCO

Duha ka mga independent power producers (IPPs) sa Sugbo ang gikatakdang mohatag og dugang suplay sa kuryente aron masulbad ang power shortage sa Metro Cebu nga miabot na og 200 megawatts ug nagpugos sa Visayan Electric Company (VECO) pagpatuman og tagsa ngadto sa tag-duha ka oras nga rotation brownout.

Kini mao ang Korean Electric Power Corp. (KEPCO) nga anaa mahimutang sa siyudad sa Naga ug ang Cebu Energy Development Corp. (CEDC) sa siyudad sa Toledo.

Ang Kepco ug ang CEDC nagkadungan sa pagpundar sa ilang coal-fired power plant dinhi sa Sugbo aron pag-abag sa panginahanglanon sa kuryente sa Metro Cebu.

Apan dili buot ipasabot nga tungod sa taas nga panginahanglanon sa kuryente, pasagdan na lang ang duha ka kompaniya sa pag-operate bisan adunay mga balaod nga malapas, sama sa balaod sa kalikupan. Angay pasalamatan ang environmentalistang mga abogado tungod sa ilang paghago aron ang mga kompaniya, ilabi na ang mga power producers, motuman sa regulasyon.

Ang KEPCO ug CEDC gikatakdang buksan ning tuiga. Apan babag sa ilang pagsugod sa operasyon ang labayanan sa ilang coal ash. Hangtod karon, wala gihapon silay permit alang niini.

Sa duha ka kompaniya, ang CEDC lamang ang walay problema tungod kay mahimo silang molabay sa ilang coal ash sa Carmen Copper Mining (karaang Atlas Mining) sa Toledo.

Ang Kepco maoy mag-atubang og dakong suliran tungod kay hangtod karon wala gihapon silay alternatibong labayanan sa coal ash. Kini, tungod kay buot gihapon nilang ipadayon ang pagpakig-kontrata sa Kapitolyo nga adto ilabay ang coal ash sa Balili property sa Tinaan, Naga bisan kuwestiyonable ang pagpalit niini ug malisod kini makuhaan og Environmental Compliance Certificate (ECC).

Mga 92 porsiyento sa maong multi-million pesos nga luna sa mga Balili naglubog sa tubig-dagat. Ang classification niini timberland ug iya sa estado, busa dili mahimong mabaligya.

Apan bisan pa niini, ang Kapitolyo mopugos gihapon pag-aplay og ECC sa Department of Environment and Natural Resources (DENR).

Kun buot sa KEPCO makatabang sa power shortage sa Metro Cebu, maayong mangita na lamang kini og alternatibong labayanan sa coal ash, kay sa mag-atubang og mga environmental cases sa umaabot.