EDITORYAL - Sex education, sa balay na lang

Moralidad. Giya kini sa isi’g ka tawo aron magpuyo sa katarong.

Ang matag tawo giisip nga matarong sukad sa iyang pagkatawo. Mao kini ang hinungdan nganong “corrective” ang criminal justice system (nga sa ato pa gitumong pag-usab sa pagkatawo pinaagi sa pagpanuklog sa criminal sumala sa gidak-on sa iyang salaod) sa Pilipinas, ug dili “punitive” nga tuyo lamang pagsilot sa makasasala.

Ang “moral values” mahimong makat-onan gikan sa maayong pagtudlo sa mga ginikanan ug sa leksiyon sa tunghaan.

Apan ang pagtudlo sa ginikanan ngadto sa iyang mga anak mopatigbabaw sa mga leksiyon sa mga magtutudlo sa tunghaan.

Ang pag-apil sa “sex education” sa curriculum sa mga tinun-an sa elementarya (ug laing nahunahunaan karon ang pag-apil sa mga pre-schooler) naghatag og kakuyaw ngadto sa mga bata kang kansang mga panghunahuna hilabihan pa kalinghod ug nagkinahanglan pa sa giya sa mga ginikanan.

Tuyo sa Department of Education nga matudloan ang mga bata og responsableng pagkinabuhi ug paglikay sa iresponsableng pakighilawas. Labing dakong tuyo niini mao ang pagpugong pagtubo sa populasyon.

Apan sa duha ka forum asa mahimong matudlo ang “sex education” – sa balay pinaagi sa mga ginikanan o sa tunghaan pinaagi sa mga magtutudlo, mas kasaligan ang nahauna.

Mas nasayod ang mga ginikanan unsay panginahanglanon sa iyang mga anak, ilabi na sa natad sa impormasyon nga angay mahibaw-an sa iyang mga anak.

Kay kun isalig kini sa mga magtutudlo, kining butanga nga giisip unta nga adunay dagway sa pagkasagrado, itudlo lamang sama sa 1 + 1 = 2. Ang pag-edukar sa mga bata kalabot sa “sex” dili ingon kasayon sa pagtudlo kanila unsay “noun, pronoun, adjective, conjunction, etc.” tungod kay nabutang kini sa han-ay sa moralidad.

Inubanan sa Simbahan, ang usa ka ginikanan nasayod kanus-a mahimo niyang ipahigmata sa iyang mga anak ang butang nga mahimong makapadaghan sa iyang kaliwat dinhi sa kalibutan.