Katawhan ang nidaog

Ang mga botante mas andam kay sa mga politiko sa labing unang nasudnong automated nga piniliay. Ilang gipamatud-an nga nagpataka lang ang mga politiko-ma-administrasyon o ma-oposisyon man-nga, pila ka adlaw sa wa pang piniliay, nagpadakoay og tingog sa pagpasidaan nga:

• Kinabag-an sa 50.7 milyones ka rehistradong mga botante di pa andam sa bag-ong teknolohiya sa piniliay kay

• Di sila kamaong mogamit sa PCOS machines;

• Di sila kamaong mo-shade sa oval sa tungod sa mga ngan nga ilang napilian;

• Taas ra kaayong balota, labi na alang sa mga botante nga mubo ra’g edukasyon; ug

• Taphaw ang voters education campaign nga gihimo sa Comelec.

* * *

Sa makasaysayanong adlaw sa piniliay, gipasundayag sa mga botante nga sukwahi sa tanang pagtamay, paukyab, ug bisan sa way kinutoban nga kakulian, andam na silang moggakos sa PCOS ug sa mas paspas nga iskutenyo sa ilang mga boto:

• Nagpabilin silang masaligon bisan sa pagbakwi alang sa reconfiguration sa tanang 76,400 ka compact flash (CF) cards gikan sa napakatap nang PCOS;

• Bisan sa kataas sa pila ug kahuot sa mga presinto, mapailubon ang mga botante nga nagpaabot sa ilang turno, takos nga nimarka ug nilawog sa mga balota ug nagsaulog dihang gipahalipayan sa PCOS; ug

• Salamat sa mga botanteng nilahutay hangtod sa kadlawon sa Mayo 11, niabot og 38 milyones, o 75% sa tanang botante (80% dinhi sa Sugbo ug Central Visayas), ang nakabotar.

* * *

Human naproklamar ang mga mananaog sa lokal nga katungdanan ug sa Senado, dihang nagbuwa nang mga baba sa mga politiko pagpasangil nga biktima sila sa lapad nga pagpanikas ginamit ang CF cards ug PCOS machines, ang mga botante naniid. Nagpakabana apan nagpabiling kalma. Wa magmartsa sa kadalanan pagdason sa mga pasangil sa tikas sa piniliay kay nabantang nila nga:

• Ang tanang namasangil, gikang "Koala boy" ngadtong Manoling Morato, pulos igo lang giduol, way ebidensiya ug wa magsaba bisan sa kaseryuso sa krimen nga gitanyag ngadto nila; ug

• Hapit tanang namasangil gikan sa administrasyon nga lisod tuohan nga natikasan kay pulos maoy naa sa posisyon sa pagpanikas.

* * *

Apan ang Malakanyang, nga klarong maoy nagpasiugda sa salida, naglibog na ron unsaon paglingkawas gikan sa duwa nga ilang gisugdan. Di mahimong pugngan hangtod sa hangtod ang nag-ung-ong nga proklamasyon ni Senador Noynoy Aquino. Wa sab molampos pagpahid og pagduda sa kaligdong sa piniliay tungod sa pagmatuod sa mga botante nga di na sila ingon ana kasayon nga isud sa bulsa. Ni bisan kinsa.

Sa wa pang piniliay, gipamatud-an sa katawhan nga andam silang mopasiugda og tinuoray’ng kausaban. Human sa piniliay, gipakita ang hilom nga determinasyon pagpanalipod ug pagpatigbabaw sa ilang kadaugan.

* * *

Email:[email protected]