Ang hagit ni Noynoy

Wa pa gani ma proklamar nga pangulo sa nasud, gitandog na ang liderato ni Noynoy Aquino sa iya mismong mga dumadapig nga nagkabingkil tungod kay naglumbaanay na sa pagsipsip ngadto kaniya. Kun unsaon niya pagsulbad ang nahisgutang suliran mao kini ang atong atngan.

Sa ilang pagpangampanya sa miaging piniliay kausaban ang ilang gibandilyo ngadto sa katawhan aron kini suportahan ug botaran. Karon proklamasyon na lang ang gipaabot ni Senador Noynoy Aquino, pangulo na siya inig abot sa udtong tutok sa Hunyo 30 ning tuiga human upod unya sa iyang pagpanumpa isip pangulo sa nasud.

Sa iyang paglingkod isip pangulo sa nasud iya gyod kahang matuman ang gipanghambog na niining kausaban? Dili ba kaha sama ra gihapon sa naandan ang atong mapaabot sa iyang kagamhanan? Mao kini karon ang hagit sa umaabot nga administrasyon ni Noynoy Aquino.

Bisan wala pangutan-a ug konsultaha mangahas ako sa pagpaabot ngadto sa umaabot natong pangulo sa nasud niining mosunod: Kun gusto gayod niyang matuman ang kausaban, karon pa lang iya nang alkontrahan ug pangandaman ang lihok sa mga tawo nga nagpalibot kaniya kay ambot og nasayod ba kaha siya nga ang uban sa nagpalibot kaniya mga trapo o traditional politicians, mga oportunista ug mga buaya.

Sa iyang pagsubay sa tul-id nga dalan kinahanglan igmat kanunay ang iyang mga mata aron dili mabangga kun ugaling mokalit lang og liko ang dalan nga iyang gisubay.

Kun gusto ni Noynoy nga makab-ot ang gidamgong kausaban kinahanglan nga iyang kalimtan ang mga tawo nga nakatampo sa iyang kadaugan kun ang iduso niini dili makaayo sa nasud nga iyang gisaarang alagaran.

Sa katapusan, ako nanghinaut nga ang gidamgo ni Noynoy nga kausaban, dili lang kausaban sa dagway sa mga tawo nga nagpadagan sa kagamhanan ug sa matang sa pagpadagan niini kun dili kausaban usab nga kultural.