Makapadaog ba sila?

Nagbasol na tingali ron si Gobernador Gwen Garcia nga iyang gidasonan ang pasalig sa iyang manghod nga si Kongresista Pablo John Garcia nga ilang hatagan og usa ka milyon ka boto si Gibo Teodoro. Labaw na tingaling nagbasol nga niapil pagbugal-bugal sa surveys sa SWS ug Pulse Asia, nga nagpakita nga nangiwit si Teodoro, ug maoy gituohan ang surveys sa way klarong mga pundok nga nag-ulug-ulog nga dako na kaayo’g labaw ang iyang manok.

Nakumbinser na tingali si Garcia karon nga di tinuod ang pasangil ni Senador Noynoy Aquino nga pinalit ra sa Quiapo ang surveys. Nakasabot na tingali nga di diay kinahanglang pangutan-on ang tanang botante aron mahimong katuohan ang surveys.

* * *

Labaw tingaling nagbasol si Garcia nga iyang gihulagway nga "kiss of death" ang pagpaluyo ni Cebu City Mayor Tomas Osmeña sa kandidatura ni Senador Mar Roxas. Kay inay mamatay ang kandidatura, si Roxas nakatigom man hinuon og 1.1 milyones ka boto gikan sa mga Sugbuanon. Nga gipanghinaot sa Partido Liberal nga sobra pang makapapas sa kapin sa 800,000 ka boto nga mayoriya ni Makati City Mayor Jejomar Binay.

Hinaot nga makadawat na si Garcia sa pagsalikway sa pipila ka Sugbuanon sa iyang manok ug sa iya mismong kandidatura. Inay dudahan ang kaligdong sa piniliay tungod lang kay mas gamay ang iyang mayoriya kay sa gipaabot. Hinaot makadawat na si Garcia nga may mga dapit nga mas ganahan ang mga botante sa iyang amahan ug ubang mga alyado.

* * *

Apan di sang kapangangkon si Osmeña og kredito sa landslide nga kadaogan nilang Senador Noynoy Aquino ug Roxas dinhi. Kay managsama silang Garcia nga napakyas pagpadaog sa tanang piliunon pagka senador nga ilang gipangampanyahan. Mao hinuoy nanglusot ang mga senatoriables nga ilang gisalikway.

May kahigayonan nga managsama ang endorsement nilang Garcia ug Osmeña-wa tingaling kapatay apan wa sab makatabang sa ilang mga gipaluyohan. Mahimong pildehunon gyod si Teodoro gipaluyohan siya o wa ni Garcia. Samang mahimong naglawig na gyod silang Aquino ug Roxas bisan nangiyugpos ra si Osmeña.

* * *

Pulos napadaog nilang Garcia ug Osmeña ang ilang lokal nga mga kandidato-tanang piliunon sa Bando Osmeña Pundok Kausawagan (BOPK) sa bahin ni Osmeña ug sa kasagaran sa mga piliunon sa One Cebu sa bahin ni Garcia. Apan ang ilang influencia mahimong wa katabang sa mga nanagan sa nasudnong katungdanan.

Maong mas makaayo alang sa mga kandidato pagka presidente, pagka bise presidente ug pagka senador nga manikay-sikay og ila ug di na hingpit nga magsalig sa lokal nga mga politiko. Ug hinaot nga silang Garcia ug Osmeña mohunong na pagpaburot sa katakos sa ilang makinarya, nga kuwang na la’g diyutay’ng ipatuo nga gasa gikan sa langit alang sa nasudnong mga piliunon nga palaran nga ilang mapilian.

* * *

Email:[email protected]