Ang kasaypanan ni Villar

Daghang mga factor ug mga hinungdan ang nakapapilde ni Senador Manny Villar. Una niyang sayop mao nga ang iyang gipa-handle sa iyang kampanya mao ang iyang mga corporate top managers, sa walay paghunahuna nga dako kaayo’g kalainan ang pag-manage sa negosyo ug sa pag-manage sa usa ka political campagin.

Wala niya isalig ang iyang kampanya sa mga tadhan nang mga political strategists ug sa mga incumbents nga mga kongresista, mga gobernador ug mga mayor. Ug wala siya’y mga media personalities nga iyang gi-umol aron unta makatabang kaniya pagpanubag ug paghatag og katin-awan sa mga isyu nga gilabay ngadto kaniya.

Ikaduhang daku nga sayop mao nga he started the campaign too early, hinungdan nga sayo usab kaayo ang pag-atake batok kaniya. Kini, nakadugang sa gasto, ilabina ang sobra ka daghan nga TV commercials ug pagpaimprinta sa mga mahalon nga propaganda materials, nga igo lang gipanglaksi tungod kay nasupak sa regulasyon sa Comelec.

Na-overlook usab ni Villar nga gumikan sa ka-advance na sa teknolohiya sa communication ug information, ang katawhan, bisan kadtong atua sa labing suok nga bahin sa nasud, well informed na, ug wala magkinahanglan sa binayran nga mga media ads ug mga commercial.

Sa ato pa, usik kaayo ang dakung gasto sa mga media commercials, nga gumikan sa over-exposure giluod na hinoon ang mga tawo, bisan tuod og nindot kaayo unta ang pagka-produce sa maong mga TV commercials.

 Gumikan sa subra niyang pagsalig iyang mga tawo sulod sa daghan niyang mga korporasyon, walay mga gobernador ug mayor ug ubang mga local political leaders ang milihok alang kaniya. Kun duna man, pila lang ka buok. Apan, limitado usab kaayo ang paglihok tungod kay subra ka centralized ang decision-making.

Dugang niini, wala siya makahatag og hingpit nga katin-awan sa mga isyo batok kaniya, hinungdan nga nahulagway siya nga usa ka negosyanting kurakot ug dili kasaligan. Ug tungod kay wala siya magpakabana sa media, sa ilang giingon, iyang na-mishandled ang media, walay milaban kaniya, maoy hinungdan nga nagkapuliki ug nangunay na siya’g panubag, hangtud nga naapikihan na siya sa panahon.

Gawas pa, wala siyay nautangan og kabubut-on. He is a self-made man, usa ka virtue nga dalaygon unta kaayo. Apan, dili kini maoy gusto sa mga gamhanang sector sa katilingban, sama sa mga dagkung negosyante, religious sects, mga powerful lobby group ug mga power brokers, tungod kay maoy ilang gusto nga kautangan sila’g kabubut-on sa mapiling presidente sa nasud, aron ma-aduna silay bargaining power, kun unsa man nga pabor ang ilang pangayuon gikan sa kagamhanan.

Sa ato pa, maoy gusto ning maong sector sa katilingban nga ang molingkod sa Malacañang ilang kagawngan, bugti sa dakung tabang nga ilang gitunol panahon sa kampanya.

Mao kini ang dakung kasaypanan ni Villar, nga misalig lamang siya sa kaugalingon niyang resources, ug wala siya mosangpit sa mga dagkung negosyante ug mga power brokers sa nasud, usa unta ka maayong mithi, apan, wala kahimut-i niining maong hut-ong sa katilingban. Next time around, Manny, listen to us also.