EDITORYAL - Botos gisaad na daan

Ang One Cebu party nga gipanguluhan ni Gob. Gwendolyn Garcia mipasalig na daan kang Gilbert “Gibo” Teodoro sa Lakas-Kampi-CMD og usa ka milyon nga botos sa Mayo 10 nga eleksiyon. Mao usab ang mga lider ni Sen. Manny Villar sa Nacionalista party.

Mao kini ang bantayanan sa mga botante: Ang inyong mga botos gisaad na ngadto sa usa o duha ka kandidato.

Giunsa pagkahibalo ni Gob. Garcia nga usa ka milyon gyud ang mahatag nga botos ngadto kang Teodoro? Giunsa pagkahibalo nga usa ka milyon usab kang Villar nga sa Lunes pa man ang eleksiyon?

Ang mga botante gyud ang magbuot kinsay ilang botaran subay sa itudlo sa ilang konsensiya.

Ang maayo niini, ipakita sa mga botante nga ang mga dagkong local politicians nga mao ray nanapi sa eleksiyon pinaagi sa pagdawat og mga campaign funds sa mga national politicians dili kanunay ang matuman, pinaagi sa pagsalikway sa ilang gi-endorso nga dili madawat sa atong konsensiya.

Human sa eleksiyon, ang mga yanong citizens ang mag-antos kun ang mga hinguwartang local politicians ang atong tumanon.