Nahimong isyu karon batok ni Mayor Tomas Osmeña ang iyang panglawas. Mitumaw kini human mikatap ang estorya nga gidagan siya sa ospital human nakuyapan sa South Road Properties (SRP).
Gisakyan pag-ayo sa kaatbang ni Osmeña nga si Jonathan Guardo ang isyu sa panglawas sa mayor, ilabi na mitumaw ang estorya nga siya na-ospital samtang nagkaduol na ang Mayo 10 nga eleksiyon.
Dili unta maayong himuong isyu ang panglawas sa tawo tungod kay dili maayong panig-ingnan ang pagsaway sa tawo tungod sa problema sa panglawas.
Hinuon, giinsister sa kampo ni Guardo nga usa ka lehitimong isyu ang panglawas tungod sa ilang pagtuo nga ang mamahimong kongresista sa habagatang distrito kinahanglang walay sakit nga grabe aron makatiwas sa termino ug walay interupsiyon ang pagserbisyo.
Ang maayo niini, tubagon na lang ni Osmeña ang pagkuwestiyon sa kampo ni Guardo sa iyang panglawas.
Bisan na-operahan siya niadtong 2008 sa kanser sa pantog, hagit sa iyang kaugalingon ang pagpangisog og sulti nga kaya niya ang pagtiwas sa termino sa pagka-kongresista.