Maayo ba god nga hatagan og 10 porsiento nga bahin ang mga traffic enforcers gikan sa koleksyon sa compromise pay sa mga madakpan nilang draybers?
Usa kini sa kabahin sa gisugyot ni Konsehal Sylvan “Jack” Jakosalem sa girekomendar niya nga kausaban sa ordinansa sa dakbayan.
Tan-aw nako nga kining maong lakang makapalambo hinoon sa kampanya batok sa mga abusadong drayber. Dagkoa na kaha og kita sa mga traffic enforcers no?
Kagahapon lang, dagkoa sa pahiyom sa mga traffic enforcers nga akong gipahibalo sa maong sugyot ni Jakosalem. Mikomedya god ang uban nga pwede na kuno sila magbaton og tulo ka asawa.
Sayonan ka nga ang compromise penalty P500 man labing minus. Kun ang usa ka traffic enforcers makadakop og 20 ka masalaypong drayber sa usa ka adlaw, nagpasabot nga P1,000 ang iyang “sideline.” Labaw pa sa sweldo sa manager.
Alang nako, angay man g’yod hinoon disiplinahon ang mga abusadong drayber. Dili ko mosakay sa baruganan ni Rudy Laconza nga pirmi lang molaban sa iyang mga kauban.
Sayonan ka nga daghang drayber daw bata nga walay buot nga anha g’yod mohunong sa eskena sa walay paghuna-huna nga sa paghimo nila niini makabalda sa pag-agi sa ubang sakyanan.
Aw, ikaw Rudy nag-drive ka man g’yod og PUJ sa rota nga Lahug-Carbon, wala ka ba makakita niini diha sa mga eskena? Usa niini mao ang eskena Gorordo ug Archbishop Reyes Avenue atbang sa eskena paingon sa Perpetual Soccour Hospital?
Kun magtinarong lang g’yod ang mga drayber dili man g’yod sila madakpan ba. Sama nako, karon kanunay na ko nga mag-drive og motor, apan magsul-ob g’yod ko og crash helmet ug kompleto sa accessories ang akong sakyanan.
Mauwaw man god ko nga mohimo og kalapasan kay pwerteng daghana nako og higala sa CITOM ug Land Transportation Office.
* * *
Sigurado ko nga hugopan sa bagang duot sa katawhan ang pagpahigayon sa grand launching sa South Road Properties (SRP) karong Mayo 8 kay gidapit ni Mayor Tomas Osmeña si Willie Nepumoceno nga molingaw sa mga motambong.
Ang Bando Osmeña Pundok-Kauswagan (BOPK) maoy mobayad sa pag-anhi ni Willie sa dakbayan aron paglingaw sa katawhan. Sigurado ko nga malingaw g’yod ang motambong sa abilidad ni Willie.
Nakakita na ko makaduha ka higayon sa pasundayag ni Willie apan gusto lang gihapon ko nga mosubli pagtan-aw. Sayonan ka nga masundog niya ang tingog ug dagway nila ni Dolphy, Erap Estrada, mga langyaw nga singer ug maayo pa mokanta.
Anha ra siya sa atubangan sa katawhan mag-usab-usab sa iyang dagway. Motalikod lang og kadiyot dayon inigbalik og atubang ngadto sa katawhan sundog na niya ang dagway sa buot niya sundogon.
Basta kay manakit g’yod tingali ang inyong mga tiyan sa pagkinatawa. Akong gipangutana si Tommy kun pila’y bayad niya kang Willie apan wala na motug-an ang mayor.
Matud niya dili na angay’ng hisgutan pa ang kantidad kay ang iyang mga dumadapig angay’ng lingawon human sa kapoy kaayo nga kampanya. Ang Mayo 8 nga maoy katapusang adlaw sa pagpangampanya alang sa eleksyon karong Mayo 10.
Kadtong mga dumadapig sa oposisyon mahimo gihapon nga motambong niining maong kalihukan. Walay gipinig, dili ka pangutan-on kun kinsa ang gisuportahan kun mosakay ka sa libreng sakyanan nga giandam nga pasakyan sa motambong.
Ang mga pik-up points mao ang SM City, Ayala, access road sa Mambaling, City Hall ug Fuente Osmeña.