Walay angay mopatuman og disiplina si Gob. Gwendolyn Garcia ngadto sa iyang mga sakop sa One Cebu party tungod kay siya labaw nga walay disiplina sa iyang kaugalingon sa iyang pagkasakop sa Lakas-Kampi-CMD.
Karong bag-o, si Malabuyoc Mayor Lito Creus na usab ang giinitan sa gobernadora tungod sa pagpirma niini og manifesto pabor kang Nacionalista party standard bearer Manny Villar.
Isip labaw sa One Cebu, buot niya nga madisiplina si Creus ug ubang mga kandidato pagka-mayor ug pagka-kongresista nga mosuporta og laing kandidato gawas sa gisuportahan sa lokal nga partido nga si Gilbert Teodoro.
Dili pa dugay, si Kongresista Nerissa Soon-Ruiz gisalikway usab ni Garcia tungod kay mibali kini og suporta kang Villar, apan wala kini niya buhata kang Kongresista Eduardo Gullas kansang Alayon party adunay alyansa sa One Cebu.
Apan unsaon man pagdisiplina ni Garcia ang iyang mga sakop kun siya labaw usab nga disiplinahonon?
Si Garcia sakop sa Lakas-Kampi-CMD. Iyang kandidato pagka-presidente si Teodoro, apan iyang kandidata pagka-bise presidente si Loren Legarda, ug iyang gisalikway ang kandidato sa Lakas-Kampi-CMD nga si Edu Manzano.