Hapit na gyud, samot na'g ka black ang mga propaganda!

Pila na lang ka adlaw, eleksyon na. Kun kandidato pa ko ron, sige na’g butobuto ang akong dughan, wala nay klarong kinatulgan, nagka-grabe ang kabuhi, ilabina kun ang kwarta nga gipaabot, wa muabot.

Ang uban tingali nga kandidato, nagsugod nag mahay nganong nagpahinayak og lansar, nga mora mag klaro ang kapildihon. Hinoon, ang uban nga medyo hayag ang kadaugan, mahinamon nga naghuwat sa oath-taking.

Nagkadaiya ang mga gibati karon sa atong mga pilionon. Ingonman, sa die hard kaayo nga mga dumadapig.

Anyway, mao kini ang eleksyon sa atong nasod. Alegre, apan kulbahinam. Makalingaw, apan makaguol sad – ilabina niadtong seguro na ang kaparotan.

Ug karon, init na kaayo ang kampanya. Ilabina sa national scene, nagka-grabe na ang mga black propaganda. Itom na gyud kaayo ang mga propaganda. Ni-intensify na pag-ayo ang paglinabayay og lapok. Hugaw na gyud kaayo.

Denial dinhi, denial didto. Dili na nato matino kun kinsa kanila ang namakak, kinsa ang nagsulti sa tinuod. Mahimo nga silang tanan namakak. Sa ato pa, kun silang tanan bakakon, nagpasabot kini nga kun kinsa man kanila ang mudaog, nagpili kita’g dili kaayo bakakon.

Mao kini ang ilang giingon nga lesser evil ang atong pilion. Sa ato pa, mga evil silang tanan, lesser lang nga pagka-panuway ang uban.

Di ba mahimo nga sa sunod nga mga eleksyon, ang mga pilionon dili na mamakak, ug dili na mga evil? Ma-lesser evil ka o dili, evil gyud ka just the same. Mao kini ang giingon nga mangawat kag one centavo, kawatan gyud ka gihapon, bisan kun wala kaabot og usa ka milyon ka pesos ang imong gikawat.

Maayo unta nga sa sunod nga mga eleksyon, pulos na mga maayo ug buotan ang atong mga pilionon, aron nga inay magpili kita’g kinsay lesser evil kanila, ang atong pilion kinsa kanila ang labing maayo ug labing buotan.

Sa ato pa, ang atong mga pilionon pulos maayo – ug mao nay atong pilion kinsa kanila ang labing maayo, dili kinsa kanila ang lesser evil. Ug manghinaut kita nga kadtong mga evil, dili na lang unta molansa.

Yes, nagka-black pag-ayo ang mga propaganda. Kini, gumikan sa kaikag sa atong mga pilionon pagdaog. Ug kinahanglan ilang dauton pag-ayo ang ilang mga kaatbang, aron mogimaw ang ilang katarong. Mao ba ni? Kinahanglan bang imong inudnod sa lapok ang imong kaatbang aron makit-an ang imong katarong ug kaligdong?

Dili na ni maayo. Atong paningkamotan nga magmalinis gayud ang umaabot nga eleksyon. Atong i-prove sa tibuok kalibutan nga kitang mga Pinoy kamaong mo-hold og usa ka clean & honest election. Di ba ni nato mahimo, Dro?