Ang mental health ni Noynoy

Kaniadtong miaging semana nakadawat ko og dokumento nga nagtug-an sa pagpakonsulta sa ginganlan og Benigno Simeon Cojuangco Aquino III nga ilado sa angga nga Noynoy sa Department of Psychology sa Ateneo De Manila University sa may Loyola Heights, Quezon City.

 Sigon sa dokumento, ang 36 anyos pa kaniadto nga pasyente ug karon kandidato sa pagka Pangulo sa Pilipinas gipakonsulta tungod kay maglaway-laway ug depressed na sa sobra napulo ka adlaw. Ang iyang igsoon nakamatikod nga hingatulgon, linga ug maglibog sa pangalan sa mga katabang ug membro sa iyang pamilya.

Sa dihang gipangutana atol sa psychiatric assessment ang pasyente mitug-an nga maglisod siya sa pagsulti, minos ang iyang konsentrasyon ug apektado ang iyang huna-huna tungod sa grabing stress mugna sa iyang trabaho ug panagbuwag sa iyang hinigugma nga usa ka flight attendant. Giingon usab sa pasyente nga gibati siya sa pagkabakikaw ug murag pamati niya nga hapit na matapos ang kalibutan.

Sigon sa assessment ug diagnosis ang pasyente adunay clinical disorders, apil na ang major disorders ug learning disorders busa girekomendar ang pagpadayon sa regular nga psychotherapy sessions hangtud nga mawagtang ang depression sa pasyente.

Ang unod sa dokumento nga akong nadawat gipanghimakak sa kampo ni Noynoy ug ilang giingon nga peke kini. Ila pang gipasanginlan ang kampo ni Manny Villar nga maoy nagpakatap niini tungod kay despirado na kini. Mao ba.

Kun dili tinood ang unod sa dokumento nga mikatap nga nag-question sa mental health ni Noynoy mas maayo seguro nga dili lang kutob sa general denial ang iyang kampo. Mas maayo seguro nga magpahiling sa psychologist o psychiatrist si Noynoy atubangan sa mga sakop sa media o bisan representante ni Villar aron ipamatuod nga dili tinuod ang pasangil.

Mahinungdanon man ugod ang state of health sa mamahimo unya nga pangulo sa nasud tungod usab sa pagkamahinungdanon sa iyang trabaho. Sayonan mo kun pananglitan mapresidente si Noynoy unya ma-depressed siya unsa kahay mahitabo sa daghan niyang gimbuhaton. Makaila pa kaha siya sa mga membro sa iyang gabinete? Ang ako og modeklarar siya og gubat sa China kay nagtuo nga hapit na matapos ang kalibutan? Simbako palayo pito ka lawod.

* * *

Tugoti nga akong ipaambit kaninyo kining txt nga akong nadawat kagahapon: Sa tanang dumadapig ug kahigalaan, ang grupo sa mga abogado dinhi sa Sugbo mopasaka og kaso sa mga kandidato nga adunay mga campaign posters nga gipangbitay ug gipanglansang sa mga kahoy sugod karong Abril 16. Matud pa ni Atty. Tony Oposa aduna kami mga posters sa may highway sa Liloan ug Compostela ug sa ubang mga dapit sa Lalawigan sa Sugbo. Busa akong giawhag ang akong mga dumadapig, mga volunteers ug mga kahigalaan sa pagtangtang sa maong mga campaign posters sa labing madaling panahon. Si Gilbert Remulla misunod sa election code and will fully comply the rules. Isip usa ka environment advocate, si Gilbert Remulla misuporta sa krusada batok sa illegal nga pagbutang sa mga campaign posters. Ako mihangyo kaninyo. Salamat.