Ayaw g'yod kasuko

Mora’g nakabantay ko nga nahiubos kanako si San Roque barangay captain Roger Ruizo kay dili na motubag bisan sa akong mga text messages aron unta akong pakighinabian sa mga isyu nga naglambigit sa iyang barangay.

Ang posibleng rason nga nahiubos nako si Kapitan Ruizo mao ang kanunay nako nga pagtuki sa kontrobersyal nga isyu nga naglambigit kaniya ug sa ubang mga opisyal sa barangay San Roque. Angay ba god kana nga ikasuko?

Dunay reklamo nga gihimo ang kauban nimo nga opisyal, usa ka konsehal sa barangay San Roque nga si Lidiore “Boy” Miranda, busa wala ko magtumo-tumo sa akong report ug angay nimo kini nga tubagon gawas lang kun wala kay ikatubag sa maong mga pasangil.

Gihatagan nako og pagtagad ang reklamo ni Miranda tungod kay natan-aw nako nga duna kini’y gibug-aton ug sa laktud wala ka pa g’yod makatubag direkta sa maong mga akusasyon sa imong konsehal.

Gusto g’yod unta ko nga mokuha sa imong pamahayag sa matag isyu apan lisud kana makontak karong panahona. Tambag nako sa mga tawo nga malambigit og mga isyu nga mas labing maayo g’yod nga motubag kamo sa mga isyu kun ang media mokuha sa inyong baruganan.

Pwerte kabug-at sa mga pasangil batok ni Kapitan Ruizo ug sa ubang mga opisyal. Sayonan ka nga sa rekords sa usa nila ka kalihukan sa barangay nga gihimo kaniadtong miaging tuig apil kuno sa mitambong ang kanhi nila kapitan nga si Telesforo Rabaya.

Unsaon god tawon pagtambong ni Rabaya nga dugay na man ni kaayo nga namatay. Ang ilang rekord nga gisumiter sa Department of Interior and Local Government nagpakita nga si Rabaya apil pa sa mikaon sa mga pagkaon nga gidalit sa nanambong.

Gawas ni Rabaya duna pay daghang mga tawo nga gilista nga kunohay nakaapil sa maong kalihukan sa mga disabled person nga mipirma na og affidavits nga gisundog ra ang ilang pirma, ang uban igo rang gisuwat ang ilang ngalan. Dili ba diay kana lehitimo nga isyu?

Usa sa reklamo ni konsehal Miranda mao nga dili siya hatagan og kopya sa “minutes” sa ilang mga sesyon sa barangay. Naunsa ka god tawon Capt. Ang imong pamahayag nga mahadlok ka mohatag og dukomento kay basin gamiton kini ni Miranda pagpangita og dugang isyu batok nimo.

Bisan pa’g hatagan nimo si Miranda og pipila ka bantal nga mga dukomento basta wala ka lay gihimong anomaliya dili ka angay’ng mahadlok.

Basaha ra god ang section 5 (a) sa Republic Act 6713 aron ka masayod unsa g’yod ang gilatid sa balaud. Human nimo og basa kun imo kini nga masabtan, makaingon ka g’yod nga sayop ka diay sa imong hukom nga dili nimo pahatagan si konsehal Miranda og kopya sa inyong minutes sa sesyon.

Duna pay laing isyu nga nanghuwam kamong mga opisyal sa barangay og kwarta sa bangko, unya ikaw ug ang imong treasurer maoy mipirma isip garantor, nga kolektahan g’yod ninyo og bayad ang mga nakautang unya ibayad sa bangko, apan wala diay kini ibayad sa bangko.

Tungod niini, nag-atubang kamo og kaso nga gipasaka sa kanhi ninyo chairman sa Sanguniang Kabataan (SK) diha sa barangay San Roque.

Ang tinuod daghan pa kaayo nga isyu nga naglambigit kanimo Kapitan Ruizo nga wala lang gani nako gituki. Awhag nako nga tubaga kini inay nga masuko ug dili na motubag.

Kun sa imong pagtoo gihimo ni Miranda ang pagsaway tungod kay nagtinguha siya nga molansar pagka kapitan, dili kana isyu. Sa ako na nga giingon bisan pa’g hatagan nimo og bukid sa mga dukomento si Miranda basta wala kay sayop dili ka g’yod mahadlok.