EDITORYAL - Wala gyuy tahod

Padayong wala gitahod ni Pres. Gloria Arroyo ang ruling sa Korte Suprema nga nagtugot lamang kaniya pag-appoint og Chief Justice bisan nahasulod na sa constitutional ban on midnight appointment.

Kini, sa dihang iyang gi-promote si Arturo Lomibao gikan sa iyang pagka-assistant secretary sa Land Transportation Office (LTO) ngadto sa pagka-undersecretary for legislative affairs.

Sa mga tigpaniid sa dagan sa Malacañang, kining gihimo ni Pres. Arroyo usa ka “indikasyon” nga gusto niining magpabilin sa gahum human sa iyang termino nga matapos sa Hunyo 30, 2010.

Nasayod si Pres. Arroyo nga si Lomibao hilabihang kadako og sala sa mga motorista tungod sa pagpatuman niini sa Radio Frequency Identification (RFID) diin milyones pesos na ang natigom niini sa dihang gideklarar kini sa Korte Suprema nga ilegal. Ang kita sa LTO sa RFID stickers wala na ma-account ni Lomibao.

Busa ang pagbutang kang Lomibao sa puwesto isip undersecretary on legislative affairs usa ka dakong kuwestiyon kun pagpangandam na ba kini ni Pres. Arroyo sa iyang dakong plano pagpangulo gihapon sa gobyerno isip Prime Minister kun molampos iyang tinguha unya sa dugay na natong gibabagan nga Charter Change pinaagi sa Constituent Assembly gamit ang iyang mga alyado sa Ubos Balay Balaoranan.

Nawala na gyud ang iyang maayong pamatasan.