Mapahitas-on si Manny Villar

Sa iyang mga political ads gustong ipakita ug ihulagway ni Manny Villar nga siya gikan sa kabus nga pamilya sa tuyo ug tumong nga mosimpatiya ug mosuporta sa iyang kandidatura ang gibana-banang 80 ngadto 90 por siyento nga mga botanteng kabus.

Apan nasakpang dili diay tinood ang iyang gipasiatab nga political ads. Kay dili diay tinood nga kabus si Manny Villar. Dili diay tinood nga ordinaryong manindahay og isda ang iyang inahan (sigon sa gipakita sa iyang political ads), kay ang tinood dealer diay kini og isda. Ang dealer ug isda adunahan samtang ang manindahay og isda kabus.

Dili diay tinood nga namatay ang igsoon ni Manny Villar nga si Danny tungod kay way ikapalit og tambal ang iyang mga ginikanan, ang tinood aduna silay ikapalit og tambal (gani didto man dad-a ang iyang igsoon sa labing mahalon nga tambalanan) apan wa pa lang gyoy tambal nga makapaayo sa sakit sa igsoon ni Manny Villar niadtong panahona.

Karon pa ko di lang diay tigpakaaron-ingnon, mapahitas-on pa gyod diay si Manny Villar. Tungod sa kadaghan niyag kuwarta, ang mga dealer og isda diin nahimutang sa maong hut-ong ang iyang inahan kaniadto kabus lang para kaniya.   

Tungod sa kadaghan niyag kuwarta ang labing mahalon nga tambalanan kaniadto sa Pilipinas ordinaryo na lang para kaniya ug kay tag-iya naman siya og daghang subdivisions, kayutaan ug bisan gani sementeryo mao nang kabus na lang para kaniya

ang mga nagpuyo sa mahalong subdivision nga ilang gipuy-an kaniadto.

Sa iyang pagpakaaron-ingnon ug pagka mapahitas-on di makatilaw si Manny Villar sa akong boto. Mas mobotar pa ko ni Erap kay ni Manny Villar. Hinoon di siya angayang mabalaka kay usa ra man ning akong boto, gawas pa ako man usab nga iboto sila si Congressman Gilbert Remulla ug Col. Ariel Queruben ang duha sa iyang kandidato sa pagka senador.