Sugod kagahapon, gisaulog natong mga Pilipino ang Philippine Veterans Week (PVW).
Sa usa ka tuig, usa ka semana lamang ang atong gitagana aron paghinumdom sa kaisog ug bayanihong buhat sa atong mga beterano. Ang usa ka semana nga kasaulogan gitumong pagtapos sa “Araw ng Kagitingan” sa Abril 9.
Apan sama sa naandang selebrasyon, kutob na lamang kita sa paghinumdom sa mga buhat sa mga beterano pagdepensa sa atong yuta batok sa mga langyaw’ng sundalo sa ikaduhang gubat sa kalibutan.
Wala gihapoy maayong programa ang gobyerno, ilabi na ang Armadong Kusog, alang sa mga katigulangang nakasulay pagpakigbisog aron kita dili mailog sa ubang nasud.
Bilyones ka pesos gikan sa kaban sa gobyerno nakawat sa mga kurakot sa gobyerno. Hayahay unta ang mga beterano sama sa mga kabus nga mga Pilipino kun wala pay korupsiyon.
Karon nga hapit na ang eleksiyon, ang mga beterano unta maoy ibutang sa atong hunahuna sa dili pa kita mokuskos sa balota nga ipansak sa Precinct Count Optical Scan (PCOS) machine.