Pagmatngon g'yod

Wala g’yod itugot sa mga polis nga sila mosalmot og “partisan politics.” Mahimo nga sila mopili og kandidato atul sa eleksyon apan nongka nga mohimo og pagpangampanya.

Ang pagsul-ob og T-shirt nga dunay marka sa usa ka kandidato maisip na nga usa ka matang sa pagpangampanya.

Nahiagi ko kagahapon sa Parian police station ug maoy nabantang sa akong panan-aw ang usa ka polis nga insikon ang mata, nga nagsul-ob og blue nga T-shirt nga may dagko nga marka nga “Bebs Andales.”

Sigurado ko nga ang maong polis nakaila ug nasayod g’yod nga ang tawo nga nagdala sa maong ngalan usa sa mga kandidato sa eleksyon karong Mayo 10.

Sa iyang pagsul-ob sa maong T-shirt masabot ra nga nangampanya siya ni Andales. Angay g’yod unta kini nga likayan nato. Kami bitaw sa media maglikay g’yod nga mosul-ob sa maong matang sa T-shirt.

Duna god ko’y T-shirt nga may marka nga BOPK, apan wala nako kini isul-ob. Gitanyagan usab ko nga hatagan og T-shirt nilang “Guardo” nga may marka nga “OUR” apan nalipay usab ko nga wala idayon og hatag kay pagka karon nga election period dili pa usab nako masul-ob.

Kamong mga polis likayi g’yod ninyo nga mahibaw-an ang inyong gidapigan kay ang mga kaatbang anang mga kandidato kang kansang T-shirt inyong gisul-ob makasaway kaninyo.

Gipahibalo nako kini ni Koronel Patrocinio Comendador kun gitugotan ba niya ang mga polis nga magsul-ob og T-shirt nga may marka nga ngalan sa kandidato.

Sa pasiuna niya nga pakisusi didto sa Parian police station nga kadtong akong nakit-an, miretiro na kuno sa serbisyo. Buyno, walay problema kun mao kana.

Sagdi lang, magsusi unya ko kun kadtong akong nakit-an tinuod ba nga miretiro na sa katungdanan.

* * *

Dunay lumulopyo sa barangay Tisa nga mikontak kanako kagahapon sa buntag ug mireklamo kabahin sa mga tricycle nga nag-operate sa ilang dapit kay kuno walay mga rehestro.

Iyang bana-bana nga mga 90 porsyento sa mga nagdagan nga tricycle diha sa Tisa ug silingan nga barangay wala g’yoy rehestro. Akong gitug-anan ang maong tawo nga mora’g tinuod ang iyang report kay wala pa g’yoy pormal nga pagtugot nga maka-operate ang mga tricycle dinhi sa dakbayan.

Akong ingnon ang maong tawo nga mireklamo nako nga imposible kaayo nga ang mga opisyal sa dakbayan makahimo’g aksyon niining maong problema pagka karon nga nagsingabot ang eleksyon.

Ang ato na lang unta nga lauman nga makahimo’g aksyon niini mao ang kadagkoan sa Land Transportation Office, apan unsaon nga tungod sa kakuwang og mga sakop dili sila makahimo’g lihok.

Ang maayo’ng han-ukan nato sa pagsaway niini mao ang hepe sa LTO nga misuspenso sa tanang deputized agents nga makaabag unta sa pipila niya ka sakop pagpatuman sa balaud.

Maayo unta og ang iyang gipangsuspenso kadtong mga deputized agents nga gidungog nga kurakut, apan ang mga sakop sa Task Force Alpha nga gikahadlokan gani sa mga drayber kay dili gayod magpanuko pagdakop kun sila makahimo og salaud, giapil man pagsuspenso.

* * *

Kadtong dunay mga reklamo, basta balido lang, tawga lang ko sa 511-7984 kay basin matabangan ko kamo pag-expose sa inyong reklamo. Ang akong lindog Renbor Patrol mabasa ninyo matag Sabado, Domingo ug Miyerkules, unya may lain usab ko nga lindog, ang Birador nga mabasa sa The Freeman matag Martes.