Ang kakabus ug edukasyon

Kaniadtong Martes didto ko sa among lungsod sa Bien Unido, Bohol kay gidapit nga mamumulong sa ika 13 ka tuig nga graduation ceremony sa Bien Unido Academy. Unya personal usab nako nga gitunol ang Gerry Q. Auxilio Jr. Excellence Award ug Leadership Award ngadto kang Jowane Autentico Zapanta kinsa maoy Valedictorian sa 88 ka mga tinun-an nga migraduwar.

 Wa nako balibari ang imbitasyon ni Sir Veer Autida kinsa mao ang principal sa tunghaan tungod kay kahigayonan naman nako nga mapaambit ngadto sa mga graduates ug mga ginikanan ang akong kasinatian. Looy man ugod tawon ko kaniadto. Tungod sa kawad-on ug kalisod ako tawon nga gilangoy ug gilamoy ang mga pagbiay-biay sa mga tawong mapahitas-on sa ilang pagkabutang ug gihimo nako kining gabayan ug sakyanan sa pagkab-ot sa akong mga tingoha.

Busa agi og pagdasig gihagit ko ang mga ginikanan ug mga graduwado nga dili tugotan ang kawad-on ug kakabus nga mokontrolar sa ilang ugma.Hinoon himoon kining sakyanan sa pagkab-ot sa ilang tumong ug tinguha sa kinabuhi. Hinungdan nga gidasig ko sila sa pagpadayon sa ilang pagtungha sa kolehiyo, manglimbasog ug dili lang makontento sa ilang nahuman nga secondary education kay kun ang kawad-on ug kakabus mao ang sakyanan, ang edukasyon usab ang yawe sa pag-abot ug pagkab-ot sa ilang tumong.

Ambot og sulagma ba lang kaha, ang kauban nakong mamumulong nga si Pablito Villalon o Pabz kinsa mao ang Private Schools Coordinator sa Department of Education sa lalawigan sa Bohol pariha upod diay nako og kahimtang samtang nagtungha pa sa kolehiyo. Maong nakaingon ko sa akong kaugalingon nga ang kalampusan makab-ot gyod diay kun ikaw maningkamot.    

Sa mga graduates ug ilang mga ginikanan Congratulations.

* * *.

Tinood gyod kaha ang rason ni Gibo sa iyang pagluwat isip chairman sa ilang partido? Ambot lang! Pero ang basa nako sa hukom ni Gibo mao nga dili siya gusto nga madamay sa away-away sa mga sakop sa ilang partido nga makadugang unya sa kagamay sa iyang chances of winning.