Katungod sa matag Pilipino ang moboto ug magpapili sa eleksiyon. Katungod kini nga gipadayag mismo sa atong 1987 nga Konstitusyon.
Apan kun gamiton na kining maong katungod sa usa lamang ka pamilya nga gustong mogamot sa gahum ug bahandi, angayan na kining pakgangon aron ang maong batakang katungod dili mabugal-bugalan ug mohatag og kaangayan alang sa ubang kuwalipikado nga naglaraw usab nga moserbisyo sa katawhang Pilipino.
Mao unta kini ang angay itisok sa alimpatakan sa pamilyang Arroyo aron si Pres. Gloria Arroyo maka-amgo nga kun tinuod ang pangagpas sa kadaghanan nga ganahan siyang magpabilin sa gahum lapas sa iyang termino sa Malacañang pinaagi sa pagpapili pagka-kongresista ug pinaagi sa mga alyado sa Kongreso, himuon siyang Speaker of the House -- pangandam sa Charter Change nga maghimo kaniya og Primero Ministro.
Ug makaamgo usab ang ubang sakop sa pamilyang Arroyo, sama nilang Mikey, Dato ug Iggy nga ang pagdagan og elective position nilang mga Arroyo sa Mayo 2010 nga eleksiyon usa ka timailhan nga sila dili pa gustong manaog ug mohatag sa renda sa kagamhanan sa mapili unya ning nagsingabot nga eleksiyon.
Bantayanan kaayo kini.