EDITORYAL - Wala nay batasan

Gi-flush na sa inidoro ni Pres. Gloria Macapagal-Arroyo ang iyang maayong pamatasan -- ang maayong pamatasan nga angay unta bisan sa usa lamang ka simple nga Pilipino.

 Kini, sa dihang mihimo siya og midnight appointments bisan sa constitutional ban niini.

Gihimong sukaranan ni Arroyo sa iyang dinali-dali nga pagpamutang og mga tawo sa lain-laing puwesto sa Malacañang ang desisyon sa Korte Suprema (nga kadaghanan sa mga justices iyang gipang-appoint) nga nagkanayon nga siya makahimong mo-appoint og Chief Justice bisan sa constitutional ban on midnight appointments.

 Ang desisyon sa Korte Suprema nagkanayon nga mahimong maka-appoint si Arroyo og chief justice tungod kay ang maong constitutional ban alang lamang sa Executive branch. Human modesisyon ang Korte Suprema, wala'g tuo dayon ang pagpang-appoint ni Arroyo sa iyang mga tawo.

 Buhat kini sa presidente sa atong nasud nga wala na motahod sa Konstitusyon, sa balaod, ug sa katungod sa mga tawong iyang gipalagpot nga wala gani masayod nganong sila gipang-ilisan.

Hain na ang maayong pamatasan sa inahan sa Pilipinas? - Ni John Rey Saavedra