EDITORYAL - Maminaw kaha si Pacman

Makadaghan nang higayon nga gimaymayan ni Nanay Dionesia ang iyang anak nga si Manny Pacquiao sa pagretiro sa pamoksing. Pakyas ang inahan sa iyang hangyo.

Ning bag-o pa gipadayag ni Nanay Dionesia nga usbon niya ang hangyo da'ang maymay ngadto sa iyang anak kinsa   giila karon nga labing hawod nga boksidor sa tibuok kalibutan.

Makatarunganon ba ang tinguha ni Nanay Dionesia. Daghan ang mitubag niini nga OO. Kay medyo bug-at man sad ang rason ni Nanay D. Usa niini mao nga matag boksing ni Manny mosaka ang iyang blood pressure. Nahadlok siya isip inahan kun unsang mahitabo sa anak.

Naay miingon da'ang pangutana: Kuwartahan na si Manny. Unsa pa gyung gusto niya? Dako nang grasya ang nahatag kaniya sa Ginoo. Angay lang nga iya sang hatagan og bili ang hangyo sa inahan.

Apan daghan ang nagduda nga mapakyas gihapon ang inahan. Naay daghan pa ang gusto makasapi sad gikan sa singot ug dugo ni Manny. Lakip niini mao ang boxing promoters.