Gugma sa Amahan

Ang manghud nga nangayo sa iyang bahin sa katigayonan nga sama ra nga iyang gitunglo nga mamatay ang iyang Amahan kay kaniadto ang katigayonan mahimong bahinon lamang kun mamatay na ang Amahan. Segun sa naandan bugtong ang Magulang lamang ang dunay katungod gyud unta sa pagdumala sa mga kabtangan sa iyang Amahan ug dili ang iyang Manghod.

Ang pagpahilayo sa manghod gikan sa ilang panimalay maoy timailhan nga buot niyang putlon ang iyang kalambigitan sa iyang pamilya/banay. Ang dakong gutom ug ang pagkahurot sa iyang nadala maoy nagpaamgo sa mausikong anak nga mobalik sa ila dili tungod kay buot siyang maghinulsol apan tungod kay buot pa siyang mabuhi.

Ang amahan bisan pa man kun tataw na kaayo nga binuang ang gihimo sa iyang anak apan siya iyang gidawat gihapon kay bililhon man siya alang kaniya. Butang nga gikalagotan pag-ayo sa iyang magulang anak.

Ang Dios maayo ug maluloy-on. Tagana sa kanunay sa pagdawat kanato sanglit siya man ang atong Amahan. Aron mas mahimong makahuloganon ang atong pagkompisal gikinahanglan nga kini kinasingkasing gayud ug dili taphaw lamang.