'Automated voting'

Marami ang duda sa poll automation

Na bagong sistema ng ating eleks’yon

Sinasabi nila baka raw maurong

Baka madeklara “failure of election”!

Ang poll automation kung noo’y nauso

Hindi magdududa ang maraming tao;

Kung may limang taong ito’y naensayo

Magiging maganda ang ating pagboto!

Ang mga makina’y binili nang mahal

Pero hindi tiyak kung ito’y mahusay;

Baka pag binilang ang boto ng bayan –

Mas maraming daya kaysa sa nag-manual!

Bakit ang partido’y pumasok sa bitag

Mga kandidato’y inihanay agad?

Inakala nilang sila ay mapalad

Sa isang halalang resulta’y baligtad?

Malaki ang perang dito ay inubos

Ng ating gobyerno na naghihikahos;

Pambili ng machines bakit nakalusot

Sa Congress at Senate na dapat nagtanod?

Lahat ng pakulo ng ating Comelec

Pati ang Palasyo ay naging kapanig;

Di nila naisip – maraming dishonest

May makina’t wala ang resulta’y panis!

At bakit nga hindi dito sa ‘ting bansa

Pulitiko’t hindi’y mga mandaraya;

Dahil sa naubos malaking halaga –

Babawiin nila’y higit sa nawala!

Naikamada na automated voting

Kaya bunga nito ay ating hintayin;

Kung ito’y maganda tangkilikin natin –

Kung ito ay palpak ay ating sumpain!

At kung tayo’y bigo sa naging resulta

Itong bansa nati’y wala ng pag-asa;

Mga pagbabagong hangad na makita

Baka mangyari lang kung tayo’y patay na!