Ang condom ug lollipop

Kung wa pa maulahi sa pagkatudlo isip kalihim sa Departamento sa Panglawas si Esperanza Cabral, labing seguro sa Hunyo 30 ning tuiga usa siya sa manumpa isip bag-ong Senador sa atong Republika. Siya unta ang mosunod ni kalihim Juan Flavier nga gipasikat sa atong simbahang Katoliko ug gani nahimo gyong Senador tungod sa condom.

 Karon si kalihim Cabral na usab ang gipasikat sa atong simbahang Katoliko tungod gihapon sa condom. Hinuon may gamay nga kabag-ohan sa kaso ni Cabral kay napuno man ang lollipop.

Kaniadtong miaging adlaw gidawat ni kalihim Cabral ang hagit nga lantugi o debate sa mga Obispo mahitungod sa pagka epektibo sa condom isip pang alkontra sa pagkuyanap sa HIV/AIDS.

Ang atong simbahan mibarog ug milalis nga dili gayod epektibo ang condom bisan pa man sa pagpamugos sa Departamento sa Panglawas nga epektibo gayod kini. Ang duha ka protagonista aduna gayod seguroy lig-on nga basihanan sa ilang mga baruganan kay pulos man gyod sila nangugat sa ka tinood sa ilang mga baruganan. Seguro ang atong simbahan misuway na sa paggamit og condom unya napalpak mao nang ilang gibarugan nga dili gyod ni epektibo. Seguro ang taga Departamento sa Panglawas misuway na sa paggamit og condom unya nahimo kining epektibo.

Ambot unsa bay naa sa condom nga gilantugian man gyod kini sa atong simbahan ug departamento sa Panglawas? Unya init pa gayod kaayo ang ilang panaglantugi niini. Sa ilang pag insister hapit na lang ugod mangutana ang atong mga pari kun nganong mogamit mo og condom nga dili man gani sila. He he biro lang.

Bitaw, ang lantugi sa paggamit o dili paggamit og condom maayo alang sa imong paghukom isip mabuot nga lungsuranon. Kini tungod kay bisan unsaon pa sa atong simbahan ug departamento sa panglawas sa pagpamugos sa paggamit og dili paggamit og condom, ang paghukom anaa ra gihapon kanato. Ang ilang gihimo igo lang nga migiya kanimo.