Mibisita kanato ang usa ka lider sa kampanya sa usa ka dehado nga kandidato pagka-Presidente ug nagtabi kami bahin sa puruhan sa iyang kandidato.
Ingon ko maayo man ang iyang gipaluyohan nga pilionon apan mora’g way kahigayonan nga modaug.
Wa siya malain. Mipahiyom hinuon. Apan naigo kita sa iyang tubag.
“Kun ang tanang botante dili mopili sa usa ka kandidato nga maayo tungod lang kay sa ilang hunahuna way purohan nga modaug, dili gyud ni modaug ug kaanugon sa iyang pagkamaayo unta,” matud niya.
“Mao kanang hinungdan nga bisan pa sa kamaayo sa kandidato dili gyud modaug kay nabatasan na sa atong mga botante nga adto botar sa kandidato nga sa ilang tan-aw dumadaug,” puno pa niya.
“Angay tingaling usbon ang maong kinaiya sa atong mga pumipili,” matud pa sa atong bisita. Ug kita mitangdo. Ni Juanito V. jabat