Incompetent gyud ang Comelec

Sa miaging gabii nanumpa atubangan ni Judge Geraldine Faith Econg isip mayor sa lungsod sa Daanbantayan si Engr. Agosto Corro. Samtang sa akong pagsuwat niining maong lindog wa pa mahibaw-i kun nakapanumpa na ba ang iyang bise mayor nga si Dr. Jose De Leon. Kini human ideklarar ang duha sa Commission on Election nga mao gayod ang tinood nga mananaug sa 2007 nga piniliay ug dili ang anak ug inahan nga si Sun Shimura ug Ma. Luisa Loot.

Sa miaging bulan gideklarar usab sa Korte Suprema si Celestino Martinez III nga maoy tinood nga mananaug sa pagka kongresista sa ika upat nga Distrito sa Lalawigan sa Sugbo ug dili ang kasamtangang naglingkod sa maong position nga si Benhur Salimbangon.

Didto sa Luzon gideklarar usab nga maoy tinood nga mananaug sa pagka gobernador sa ilang lalawigan si Obet Pagdanganan ug dili ang kasamtangang naghupot sa maong position nga si Jun Jun Mendoza. Mao usab kini ang nahitabo sa Lalawigan sa Isabela ug Pampanga diin gideklarar sa Commission on Elections nga sila si Faustino Dy ug Lilia Pineda ang mga tinood nga nakadaug sa pagka gobernador ug dili sila si Grace Padaca ug Fr. Ed Panlilio.

Ang hukom sa Commission on Elections nga nagdeklarar sa mga tinooray nga mananaug sa piniliay ilang gipagawas mga tulo ngadto sa duha na lamang ka buwan ang nahabilin sa dili pa ang Mayo 10, 2010 nga piniliay. Pastilang paita! Gideklarar man gani nga maoy tinooray nga mananaug sa piniliay pero pila na lang ka adlaw ang nahabilin mag piniliay na upod. Hastang sakita sa dughan, alkanse sa gasto!

Kining tanan nahitabo tungod sa Commission on Elections nga dili kamao moihap og boto. Ambot ug ngano kaha nga dili man gyod sila makamao moihap og boto? Dili ba kaha kini tungod sa rason nga gisalipdan og papel de banco ang ilang mga mata?

Ang mga kaso nga akong nahisgutan sa unahan mao ang mga buhing kamatuoran sa pagka incompetent sa atong Commission on Elections. Ang pagka dili kamao moihap og boto sa Comelec mao ang hinungdan kun nganong may mga naglingkod nga opisyal sa mga elective position nga dili tinood nga mananaug.

 Ang pagka hinay og lihok ug pagka dili kamao moihap og boto sa nahisgutang buhatan mao usab ang lig-ong rason kun nganong gipursige gayod ang Poll automation hinungdan nga ning umaabot nga piniliay kita naglaum nga ang madeklarar nga mananaug kadto gayong tinood nga gipili sa katawhan ug dili kadtong mga pildero.

* * *

Ako diay nga pahalipayan ang akong mga tinun-an sa Political Science sa Southwestern University nga migawas nga kampeyon sa debate sa gipahigayong kalihukan sa Cebu Association of Political Science Organization. Ilang giparot ang debating team sa University of Cebu atol sa elimination round ug ang University of San Jose Recoletos atol sa Championship. Ang SWU Political Science debating team gilangkuban nila ni Florevieve "Val" Trazona - best rebatalist, Prince John Barriatos, Danny Torralba ug Joshua Philip Maninantan.