Faulty electrical wiring?

Gidayeg sa mga magpapatigayon sa Makati si presidential aspirant Gilbert “Gibo” Teodoro kay maayo kini nga nanubag sa mga isyu, apan ang wala nila magustohi kay gisuportahan siya ni Presidente Arroyo.

Bitaw, bisan ako mitan-aw niining maong punto. Kadtong mga tawo nga wala na makagusto ni Presidente Arroyo mahimong ma-turn off ug dili na mobotar ni Gibo.

Kay si GMA man maoy mituboy kaniya nga maoy himoong kandidato sa administrasyon, sa ato pa kun mahitabo nga makadaug si Gibo ug dunay ihangyo kaniya si GMA, balibaran kaha niya?

 Mao na nga kadtong mga tawo nga gusto og kausaban sa atong pangagamhanan, dili g’yod ganahan nga mobotar ni Gibo.

* * *

Kini bitaw’ng isyu nga panangtangon ang mga basketball boards kay hulipan ug iya sa usa ka kandidato, dili g’yod maayo.

Daghan mang dapit dinhi sa dakbayan nga angay’ng butangan og basketball boards, apan kinahanglang apil na ang stand ug goal.   Pananglit ang City of Cebu, o kaha sila si congressional aspirants Jonathan Guardo ug Mary Ann delos Santos, moilis ra sa board unya mao ra gihapon ang “goal” ug “stand,” dili tingali maayo.

Unya, kamong mga nakabutang og basketball boards, atimana ninyo pag-ilis kun mahitabo nga gabok na aron dili ilisan sa inyong mga kontra.

 Nakasuroy ko sa bukid, duna koy nakita nga mga basketball boards nga iya sa dakbayan sa Sugbo nga gabok na, wala na gani gamita kay kuyaw, mao kadto ang angay’ng ilisan.

* * *

Unsa ba g’yoy ipasabot sa pulong “faulty electrical wirings?” Kun duna go’y sunog, motumaw dayon ang report nga ang sunog kuno naggumikan sa “faulty electrical wiring.”

Kun ako maoy inyong pangutan-on, sayop kana nga termino. Ang “faulty electrical wiring” nagpasabot nga sayop ang pag-instalar sa mga alambre ug inig-switch on pa lang daan sa kuryente, sunog na.

Ang nahitabo karon mao ang subra nga paggamit og kuryente. Ingon niini ang sitwasyon. Kaniadto, ang mga building o balay, gi-design ra nga wala pa kaayo’y mga appliances – gagmay ra ang alambre nga gigamit.

 Karon kay daghan na man ang appliances, ang mga outlets gigamitan na og extention wires nga duna usa’y daghang outlets, ug didto gituslok ang mga appliances.

 Mao kini ang usa sa makapasunog. Abi ninyo og ngano? Moinit ang gagmay nga alambre kay gidesinyo ra man kini sa gagmay nga electrical use.

 Kun grabe na ang kainit sa alambre, masunog ang iyang “insulator” kanang plastic bitaw nga nagputos sa alambre. Kun “duplex wires” ra ang gigamit, aw natural, magdikit na ang duha ka alambre ug makamugna kini og kayo.

Busa, mas labing maayo nga ilisan ninyo ang alambre nga gigamit nga electrical connections diha sa inyong building ug kabalayan. Ang tukma mao nga “8” ang gidak-on nga alambre gikan sa poste, ug “10” diha sulod sa inyong balay.

Kun suga ra gani, aw pwede ra kadtong mga duplex wires, apan kun outlet gamiti g’yod og “10” unya “solid wire” aron dili kuyaw sa sunog. Dili man ko engineer, apan gitun-an ko kini kay ako ra man gani ang nag-wiring sa among balay.

* * *

Uy, duna diay mi-text nako nga may sakop kuno sa Task Force Alpha nga naghimo og binuang, namaligya og TOP, ambot giunsa.

Dili g’yod dayon ko motoo niini, apan hagiton nako ang mi-text nako nga hatagi ko og kamatuoran, dili kay sulti ra. Palihug lang kay anaa ka man kaha magtrabaho sa gobyerno.