EDSA

Karong umaabot nga Lunes, ato na sang saulogon ang EDSA nga nagpahiusa natong mga Pilipino pagpalagpot kang kanhi Presidente Marcos nga sulod sa sobra baynte ka tuig mipaubos kanato sa diktadorya ug Martial rule.

Sama sa gihapon, atong mapaabot nga ang maong kasaulogan mamahimo gihapong usa ka politikanhong kalihokan kaysa usa ka paghinumdum sa mga diwa nga nakapalampos sa nasudnong Pilipino sa pagpakigbatok sa usa ka diktadorya nga mipahimulos sa nasud ug mihimo sa katawhan nga daw robot ang panghunahuna ug midugmok sa ispirito sa Pilipino.

Siguradong daghang politiko ang mosakay sa maong kasaulogan. Siguradong makadungog na sab kita sa mga ulog-ulog, melodrama ug mga politikanhong fairytale gikan sa mga politiko nga ato nang nahibaw-an nga gusto lang mohupot og gahom alang sa personal nga panimalos, o pagpadato, o paglaban sa personal nga mga negosyo ug intereses.

Ang espiritu sa EDSA dili ang panimalos. Atong mahinumduman nga walay dugong giusik didto. Ang espiritu sa EDSA mao ang pagkahigmata sa mga Pilipino gikan sa mga dogma nga sa dugay’ng panahon, gipakalawat kanato sa mga politikong mao ray tuyo ang paghimo kanatong saop alang sa ilang personal nga gahom. Ug nga sa maong pagkahigmata, migitib ang paglaum sa pagbangon aron pagkab-ot sa kauswagan.

Apan sa maong pagmata, mibangon ba kita? Mipadayon ba kita sa unahan? Naghi-usa ba kita aron pagkab-ot sa kauswagan? Wala. Mas labaw pa kitang mius-os. Kini tungod kay ang tinuod nga kahulogan sa EDSA nasapawan na sa mga melodrama ug hysteria, diin ang tema mao ang panimalos, paglinabayay og lapok, pagdayeg sa mga adunay ikabayad sa mga supporters.

Karong umaabot nga Lunes, walay klase sa mga eskuylahan sa kaulohan. Posibleng ang mga batan-ong wala pa matawo niadtong EDSA Revolution, maminaw sa radyo o TV sa mga panghitabo unya sa EDSA, ug maoy ilang madunggan ang mga hate speech sa mga politiko. Ug busa pagkahuman sa Lunes, maoy ilang mahinumduman ang makalilisang nga traffic sa EDSA, ug mosamot na usab kita ka negatibo nga nasud pagkahuman sa mga kayugot nga maoy tema sa EDSA. Nga maoy hinungdan sa pagkasamot sa atong pag-us-os.

Busa karong Lunes, dili ko motan-aw sa kalihokan sa EDSA. Aron akong mahandum ang tinuod nga espiritu sa EDSA.

Alang sa inyong mga panahom, palihug email sa [email protected]. Daghang salamat.