Nangamote sa survey

Ang nagalakaw karon nga pasiaw sa mga eskuwelahan ug clubhouse mao ning pangutana: "Kinsay tag-iya sa Talisay?" Ang gustong motubag maglingi-lingi usa una tubagon ang pangutana kay basig naa ang tag-iya.

* * *

Tulo ka walhon nga midagan pagka-senador layo ra sa Magic 12 suma sa labing uwahing survey sa Pulse Asia. Mas ganahan pa ang mga giinterbiyu atol sa survey sa mga artista, apil na ang usa ka komedyante nga artista.

* * *

Tulo sab ka mga heneral sa military ang wa masud sa Magic 12 (sa survey). Ang usa kanila natanggong sa prisohan. So dili sila makapikat sa tulo ka walhon, kay sumbalikan sab sila'g pikat.

* * *

Nganong gisalikway man sa survey ang tulo ka walhon ug tulo usab ka tuohon (rightist)? Matud pa sa usa ka batid nga political analyst kini tungod kay ang ilang agenda nasentro lang sa ilang respective ideologies.

* * *

Sa lumba sa pagka Presidente sab si Sen. Manny Villar nakaapas na ni Sen. Noynoy Aquino. Opinyon sa pipila ka mga tigpaniid: Migasto man gud si Villar og P2.5 bilyones sa iyang tv ug radio ads. Samtang si Noynoy misalig lang sa Radyo Baba sa iyang manghud nga si Kris.

* * *

Bahin sab ni Erap, sa labing uwahing Pulse Asia survey naa sa ikatulo pero grabeng layua ra nilang Noynoy ug Villar. Pero salig gihapon siya sa iyang masa bisan MASA-ma na ang situwasyon.

* * *

Masaligon gihapon ang mga pro-Erap kon ang masa nga modaug si Erap. Mao ang gitawag nga optimism. Pero lupig na sa optimism sa akong higala nga si Ted kay matud niya si Jamby Madrigal ang mopilde kang Noynoy ug Villar.

* * *

TRIVIA -- Greetings sa atong mga higala diha sa Bantayan. Vigilant gyud ta ning eleksiyona ha. Bantayan gyud nato ang atong balota.