Kining duha ka ngalan ang mituaw niining bag-o sa mga balita. Apan samtang si Dumpit nasabit tungod sa paghimo sa iyang trabaho, si Ivler nailhan tungod sa mga akusasyon sa iyang pagbugal-bugal sa balaod sa Pilipinas human kini makapatay tungod sa lalis trapiko.
Adunay mga dili maayong komentaryo mahitungod sa nahimo ni Dumpit nga iyang nabutangan karon sa alanganin, ug aduna usay mga fans si Jason Ivler, matod pa sa inahan niini. Ug kini morag nagtimailhan nga kulang sa analytical ug critical thinking ang uban tang mga kaigsoonan, ug nga ang pulong nga moralidad, depende gyud diay sa unsay naabot sa panghunahuna sa tawo.
Pananglitan, adunay midayeg kang Dumpit kay giatubang niini ang balaod bisan nga matod pa niya, igo lamang siyang nagtuman sa iyang tahas isip mananakop. Tinuod man sab, nga sa trabahong pamulis, aduna gyuy di maayong insidente nga mahitabo. Gani, sa atong mga balaod, ang paggamit og kusog aron pagdakop sa usa ka tawo gitugotan man. Mao man gani nga adunay armas ang pulis. Gihatagan silang armas ug busa magdahom kita nga aduna gyuy kahigayonan nga magamit ang maong armas sa ilang trabaho. Hinoon, kun angayan ba ang kusog nga gigamit, kini ang pangutana nga ang korte lamang ang makahukom.
Apan ang medyo makapabalaka mao kining miabiba kang Dumpit tungod kay alang kanila, angayang puohon kadtong mga makasasala, ug gani nanawagan pa sa pagpuo sa mga badlongon. Makapabalaka kini tungod kay sa normal nga sitwasyon, ang role of law angay gyud untang tumanon, ug ang hustisya kab-oton gyud. Hatagan usab kadtong mga badlongon sa igong silot, ug kahigayonan nga mag- bag-o sa ilang kinabuhi.
Apan unsaon man kun ang sitwasyon dili maoy angayan? Kun alang sa pipila, ang hustisya gihikaw? Daghan ang nagtoo nga dugay kaayong motuyok ang hustisya sa Pilipinas. Nga kulang ang kahimanan ug suporta sa atong kapolisan, sa piskaliya, sa hudikatora. Nga kulang sa pagka-seryoso ang pamunoan nga mamaayo ang serbisyo nga mahatag sa katawhan, ug ang mga departamento mantinilan lamang samtang ang buhis sa katawhan usik-usikan sa mga dili importanteng butang? Ug busa kadtong mga anaa sa ubos sa goberno maoy masugamak sa kalisdanan sa panrabaho? Sama niini ron nga ubay-ubay niadtong naghimo sa ilang katungdanan maoy maipit, apan kadtong mga badlongon mao na hinooy adunay fans? Dili kita makabasol kun bisan kadtong mga tarong nga mga tawo dili malikayan nga mosagop nalang sa mga paagi nga gawas sa giingong role of law.
Ug kining paghatag og silot ug kahigayonan nga mag-bag-o kadtong mga nakasala, unsaon man kini pagkab-ot kun mismo ang mga ginikanan nga mao untay maghatag og kahigayonan aron mapanton ang ilang mga anak, mao na hinooy mokonsintir, mao na hinooy mopakita nga ang ilang anak maoy labing perpekto nga sama sa dili makabuak og baso, bisan layo kini sa matuod? Unsa may bation niadtong mga nabiktima ug nawad-an sa ilang mga mahal sa kinabuhi tungod sa mga sinalbahis sa mga anak niining mga iresponsableng klaseng ginikanan?
* * *
Alang sa inyong mga panahom, palihug email sa hinuktoki@gmail.com. Daghang salamat.