Expiration sa kaminyoon

Usa ka kahugpongan sa kababaehan nga gustong magpapili sa party-list election ang nagduso sa pagbutang og expiration date sa kaminyoon. Gusto sa maong grupo nga ang kaminyoon aduna lamay termino nga napulo ka tuig apan puwede kini nga ma-renew o malugwayan bisan ka pila pa ka higayon. Rason sa grupo mao nga mas maayo kuno kini kay sa mag-antos ka ug mag-agwanta sa pagpangita og salapi aron ibayad sa abogado alang sa pagpaanular sa imong kaminyoon.

 Ang mga kulatado sa asawa ug bana pabor kaayo niining maong laraw sa hugpong sa mga kababaehan tungod kay magpaabot naman lang unya sila nga moabot ang adlaw sa pag-expire sa kontrata sa ilang kaminyoon. Kun madayon kining maong sugyot wa na nimo kinahanglana ang paggasto og dakong kantidad aron makalingkawas ka sa imong asawa ug bana nga hingulata o ba kaha wa na nimo higugmaa.

Apan di ba kaha makaguba lang sa pundasyon sa atong nasud ang nahisgutang sugyot? Sigon sa atong batakang balaud ang pamilya mao ang pundasyon sa nasud samtang ang kaminyoon mao ang pundasyon sa pamilya. Mao kini ang hinungdan kun nganong gipanalipdan gayod pagmaayo sa atong kagamhanan ang pagkabungkag sa pamilya. Karon kun tugotan ta nga mo-expire ang kaminyoon inig abot sa napulo ka tuig, dili kaha malusno ang pamilya nga moresulta unya usab sa pagkalusno sa atong nasud?

* * *

Sa gipahigayon nga mock election human sa presidential forum kaniadtong miaging semana migawas nga mananaug si Gibo ug nagsunod lamang kaniya si Noynoy. Sa katapusan nakadaug ra gyod tawon si Gibo. Maayo gani kay didto sa CICC gipahigayon ang mock election nga gihugopan sa mga dumadapig ni Gibo nga gipili sa pagpasulod, kay kun wa pa, pildi gihapon unta si Gibo.     

* * *

Usa sa gipangutana ngadto sa mga presidentiables atol sa gipahigayong presidential forum nga gipasiugdahan sa mga negosyante mao: unsaon nila pagsumpo ang graft and corruption. Natural ang mga presidentiables aduna gayoy tubag sa maong pangutana. Pero sa wa pa mangutana ang mga negosyante sa maong pangutana ngadto sa mga presidentiables, nangutana upod kaha sila sa ilang kaugalingon kun unsay ilang gihimo aron masulbad ang graft and corruption?