Pag-abot nako sa Cebu City Sports Center dayong alas-9 sa buntag, halhag pa kaayo ang katawhan sa kadalanan. Tungod tingali sa padayon nga pag-uwan. Nga nibunok pag-ayo samtang nagsakay ko’g taxi gikan sa Consolacion. Sukwahi sa gikahadlokang pagkabara sa trapiko, hayahay kaayo kung nakakanaog sa eskina Sanciangko ug Leon Kilat. Tulin kong nakasubay sa sidewalk sa P. del Rosario ug Osmeña Blvd. paingon sa ganghaan sa taliwa sa Cebu City Central School ug Abellana National School. Higpit ang seguridad apan kay di man dasok ang mga tawo, dali ra kong nakasud ug nakasugod sa akong gimbuhaton.
Pasado alas-9 na apan way kisaw sa sud. Way timaan nga magsugod nang Sinulog Grand Parade. Santos nga misa ang akong naabtan. Haw-ang tan-awon ang grand stage nga gitungtongan sa pari. Kaingon nako’g manghuy-ab ning Sinuloga.
* * *
Wa pa gyod diay ko hingpit nga mobilib ni Sr. Sto. Niño. Ni hingpit nga nisalig sa iyang gahom bisan ibabaw sa kinaiyahan. Kay pagkahuman gyod sa misa, nihunong ang uwan, nihayag ang kalangitan ug inanay’ng nipakita ang adlaw. Dihang nihimo na sa ilang pakigpung sila si Bise Mayor Michael Rama ug Mayor Tomas Osmeña, morag hingpit nga gihinginlan ang bisan unsang lama sa dag-om.
Ug hingpit na gyod hinuong niinit. Ang grand stage dali rang nauga alang sa mga mananayaw. Bisan ang rubberized oval, nga labihang umoga tungod sa way hunong nga pag-uwan sa niaging mga adlaw, gitupsan sa iyang kataposang yamog. Sa naglingiting nga kainit nga maoy kasagarang nabatyagan sa 30 na ka tuig nga Sinulog.
* * *
Si Ricky Ballesteros, executive director sa Sinulog Foundation, nakalili nang daan sa milagro. Tungod sa way hunong nga uwan sa niaging semana, wa silang kabansay-bansay sa Sinulog grand finale. Wa gyod silang kahigayon paghan-ay sa higanteng entablado asa ug kanus-a mosud ug mogawas si kinsa. Pun-an pa nga buhi ang duyog nila.
Apan niadtong Sabado sa gabii, ang kataposang kahigayonan pag-praktis, nikalit og tuang ang uwan. Nga ilang gipahimuslan paghan-ay sa tanang nangapil ug nahitabo sa grand finale. Igo lang silang nahuman, nibundak na sang uwan. Hangtod pagkahuman sa misa.
* * *
Kun unsa kahalhag ang mga tawo ang akong naabtan sa buntag, mao sang kahuot nga akong natukmaan paggawas sa sports center. Baga nga lut-od sa mga tawo ang kinahanglan nga uliotan aron makagawas sa kadalanan nga nahimutangan sa mga mananayaw, floats ug mga higante.
Aron lang makasud sa labing duol nga shopping mall, kinahanglan kong molinya sud sa pila ka gutlo. Ang internet cafe nga akong nasudlan labihang punoa. Naghuwat ko’g tunga sa takna aron makasuwat ini. Wa pa kong kahibawo unsaon pagsud pagbalik pagtiwas sa among live coverage sa DYAB ug ABS-CBN. Mas gahob na ra bang gawas.
* * *
Email:leo_lastimosa@abs-cbn.com