Tan-aw nako maapiki si magpapatigayon Jonathan “Atan” Guardo sa isyu nga pagpasangil niya nga buot ipahunong sa “City Hall” ang pagpanghatag nila og bugas sa mga nasunogan sa barangay Calamba niadtong Sabado.
Ang report mao nga usa ka Cora Lim, kanhi konsehal sa barangay Calamba maoy tinubdan ni Guardo nga kuno dunay tanod nga miduol kaniya ug miingon nga dili ipahinayon ang pagpang-apod-apod sa bugas.
Pwerte man god nga sukoa ni Tommy kay gidaut nila ni Guardo ang City Hall. Ingon man god niini ang nahitabo. Kaniadtong Sabado ang mga City Hall reporters nakadawat og text message gikan sa Press Relations Officer ni Guardo.
“Heads up. Atan will distribute help to fire victims at A. Lopez, Calamba at 10 a.m. today, Jan 9. But barangay head upon orders of City Hall threatened to stop distribution.”
Nakasabot ko nganong nasuko si Tommy sa maong mensahe. Makapasuko man kini sa mga nasunogan kay mabutang man nga imbis sila mahatagan og bugas, apan gibabagan ni Tommy.
Resulta, kadtong mga biktima sa sunog, apil na ang ilang mga paryente ug mga higala, motan-aw ni Tommy nga bati nga kandidato ug posible nga dili kini botahan nila sa eleksyon.
Gitan-aw kini ni Tommy nga hugaw nga matang sa pagpangampanya kay gibutang-butangan sila og pasangil nga wala nila buhata.
Akong gikontak si Cora Lim ug gipangutana kabahin sa maong isyu. Ang tinuod diay, dunay tawo nga taga Calamba nga miduol niya niadtong Sabado sa buntag ug giingnan siya nga usa ka tanod mitug-an nga ang ilang pagpang-apod-apod og bugas buot ipahunong sa barangay kapitan.
Apan si Kapitan Victor Quijano kusganon usab nga namalibad. Mahadlok usab nga mobulgar si Cora Lim kun kinsa kadtong tanod nga giingong maoy nagtug-an sa usa ka higala ni Lim nga ipahunong sa kapitan ang ilang kalihukan.
Ang maayong buhaton karon sa kampo ni Guardo mao nga ipatug-an nila ni Lim kun kinsa kadtong tanod aron nga molutaw ang tinuod. Si Tommy miingon nga wala gani siya masayod nga dunay gikatakda nga pagpanghatag og bugas si Guardo kay adtong Sabado paingon siya sa bukid.
Buyno, dili nato mapugngan si Tommy kun mopasaka g’yod og kaso batok kang Guardo, apan hinoon kun ako pa’y Tommy maayong pasagdan lang kining isyuha kay dia man kita sa panahon sa eleksyon.
Ako nakasuway na sa mga intriga dihang misuway ko pagpapili pagka konsehal kaniadto nga gibutang-butangan ko, apan diay ang namasangil mao ra ang naghimo.
* * *
Gidayeg g’yod nako si Sir Jose “Dodong” Gullas kay gihatagan niya og pagpasidungog ang mga Sugboanon nga nakahatag sa Sugbo og dakung dungog sa lainlaing propesyon.
Karong gabii ang “Halad” ipahigayon anha sa Waterfront Hotel and Casino Cebu diin ang mga nag-unang personalidad nga pasidunggan mao sila si Maritess “Dulce Amor” Llamedo ug Pilita Corales.
Sila si Dulce ug Pilita mga inila nga mag-aawit. Mao man gani nga motan-aw g’yod ko karong gabii. Kamo diha, ayaw ninyo sipyata kining maong okasyon.
Unya, pormal usab nga gibuksan kagahapon ang “Halad Hall” nga nahimutang sa karaang Freeman building sa eskena V. Gullas ug D. Jakosalem.
Sa pag-umol ni Sir Dodong niining maong ideya, usa ko sa iyang gipatawag ug gitug-anan sa iyang plano. Usa ka maayong buhat kay kun dili nato kini himoon, mahimong kadtong mga naghatag og kasikat sa Sugbo, malimtan lang ug daw sa mahulog sa linaw dayon og katunaw.
Kamong gustong motan-aw kun kinsa ang nakatampo sa paghatag og dungog sa Sugbo, ayaw kataha pagsaka sa Halad Hall.