"Haay, Ginoo, pagkasugarol gyud ining atong mga kaigsuonan nga Cebuano," kining pagpanghayhay migikan sa usa ka babayeng negosyante og ornamental candles.
* * *
Matud pa ining businesswoman, mga lalaki -- ug pipila ka mga babaye usab -- sa usa ka dakong business firm dinhi sa dakbayan nagpinustaanay kun kinsa ang mogawas nga mananaug sa Miss Cebu 2010 beauty contest.
* * *
Ang mga hulagway kuno sa mga kandidata nga napatik sa The Freeman Lifestyle Section adtong Enero 7 maoy gihimong basihanan sa pusta.
* * *
Kuwarta ang pusta apan naa say pinustaanay nga kinahon nga beer ug panihapon sa restaurant "good for an agreed number of people."
* * *
Ang Miss Cebu 2010 beauty contest anha sa Waterfront Hotel sa Lahug ipahigayon karong Enero 12. Dose ka mga maanyag nga dalaga, pulos mga estudyante sa mga nagkalainlaing eskuwelahan sa Sugbo ang tigiay alang sa korona.
* * *
Suma pa sa atong tinubdan, duna gyu'y abogado nga mi-witness sa "friendly betting" ug ang iyang "attorney's fee" mahimong cash "balato", beer o ba kaha usa ka panihapon. "This is just for the fun of it and in the spirit of Pista Senyor," matud pa sa atorni.
* * *
"Haay, Ginoo, sugarol gyud tinuod ang mga Cebuano," matud pa sa atong tinubdan kinsa mipadayag niining pinustaanay samtang nagduwa og mahjong. Bitaw, sugarol gyud ang Cebuano!
* * *
TRIVIA -- Pit Senyor! diha sa mga trabahante sa pantalan dinhi sa Cebu City ug diha sa Ouano Wharf sa Mandaue.