ILANG saling-leader na ang lumabas-masok sa eksena pero ang kahirapan ay nagdudumilat pa rin. Nasasalamin sa dami ng mga taong sa bangketa natutulog. Sa tingin ko’y lumulobo imbes na nababawasan ang bilang nila sa paglipas ng mga araw. Lalung nakalulunos ang mga batang-paslit na gumagala at halos makipag-patintero sa mga humaharurot na sasakyan para humingi ng limos.
Huwag daw limusan ang mga batang ito anang DSWD. Okay sana kung may ginagawang supisyenteng programa ang gobyerno para sa mga pulubi. Kaso wala maliban sa “dole-out”. Minsan’y napag-usapan namin ito ni Bro. Eddie Villanueva, ang presidential candidate ng partidong Ba-ngon Pilipinas. Aniya, tila kuntento na ang gobyerno sa pagbibigay ng “dole-outs” sa mga pulubi imbes na tala-gang hanguin sila sa pagdarahop.
Halimbawa aniya, ang Department of Social Welfare and Development (DSWD) ay mayroong Christmas program sa mga batang-lansangan. Ang mga batang ito’y sinisilbihan ng mainit na makakain sa pagitan ng alas-kuwatro ng hapon hanggang alas-otso ng gabi mula December 11 hanggang January 12, 2010. Tanong ni Bro. Eddie, “bakit walang long-range program ang DSWD kaugnay ng problemang ito?”
Gayunman, pinuri ni Bro. Eddie ang mga masisipag na social workers ng DSWD pero aniya, kailangan ang mga polisiya at palatuntunang tutugon nang pangmata galan sa paglutas sa kahirapan, lalu na para sa mga paslit. Ang “dole-out” ay panadalian. Kapag naubos na, balik sila sa panghihingi. Ayon mismo sa DSWD, sa buong bansa ay 200,000 ang bilang ng mga street-children. Pitumpung libo sa mga ito ang nasa Metro Manila.
Adbokasiya ni Bro. Eddie ang kapakanan ng mga bata. Ipinatutupad ito ng Jesus is Lord Church sa pamamagitan ng ministeryong iCARE, ang compassion ministry arm ng JIL. Si Bro. Eddie ang dating JIL Church’s Spiritual Director hang-gang sa siya’y nag-leave para kumandidato sa pagka-pangulo sa darating na 2010.
Kung maipatutupad ang konsepto ni Bro. Eddie na may lakip na pagbibigay ng edukasyon sa mga batang-lansangan upang sila’y maging produktibo imbes na nagpapalimos, walang pasubaling matutuldukan na ang problema.