Si Lito O

Daghan kaayong nahibong nganong gitaktak man si kanhi Cebu Gov. Emilio "Lito" Osmeña sa listahan sa mga buot magpapili og senador sa umaabot nga eleksiyon.

* * *

Si Lito midagan sa pagka-Presidente adtong miaging presidential election ug mipakitag maayong labok. Iya pa man gani gipilde ang ubang kandidato nga duna na say ngan sa natad sa national politics.

* * *

Kanang mga wa hilabti sa Comelec list kasagaran mga way jewel. Nagpabilin tungod lang kay nakasakay og akseptadong partido. Ang uban nila naa ra sa kumingking ni Lito kun abilidad sa panggobiyerno ang hisgutan.

* * *

Si Lito Osmeña, sa banabana sa daghang tigpaniid, maoy labing bright sa tanang Osmeña nga apo ni Don Sergio. Lakip na si Tomas ug si Serge.

* * *

Dunay mga tsismis nga naay nagpaluyo ining pagkatagak ni Lito sa listahan sa mga senatorial wannabe. Pero di lang ko motangdog niana.

* * *

Nahibawo ba mo nga si Lito Osmeña maoy author sa advertising blitz alang sa Sugbo nga iyang gitawag og "An Island in the Pacific." Dihang mihinay na ang ekonomiya sa nasud ug nimenos ang pag-anhi sa nasud sa mga turista si Lito nakahunahuna sa pagdani og mga langyaw pinaagi sa pagtawag sa Sugbo nga "An Island in the Pacific."

* * *

Ang development sa dapit diin naa na ron ang Cebu (Ayala) Business Park gi-credit sab na kang Lito O.

* * *

TRIVIA -- Merry Christmas and a Happy New Year sa mga sakop sa parokya ni San Jose -- diin nahimutang ang National Shrine of St. Joseph -- diha sa Mandaue City.